Festîvala Kulturî ya Dêrsimî ya Ewropayî ya 15. do 30-31 hezîrane de Frankfurt Rebstockpark de bêra organîzekerdene.
Bi rayberîya Federasyonê Elewîyanê Demokratîkan (FEDA), Federasyonê Yewbîyayîşanê Dêrsimî yê Demokratîkî yê Ewropayî (ADEF) û Kongreyê Awankerdişê Dêrsimî (DIK) Festîvala Kulturî ya Dêrsimî ya Ewropayî ya 15. do 30-31ê hezîrane de Frankfurt Rebstockparkî de bêro organîzekerdene.
Festîvala ke do bi sloganî “Ma ne Xorasan me, ne kî Tuncelî! Ma Dêrsîm me! Hardê Dewrês bêwayîr nîyo! Riyê xo biçarne Dêrsim” bêro organîzekerdene, do di rojan dewam bikero.
2 rojan do panelî est bî
Festîvala ke bi gulbangê Pîr Zeynel Kete do bêro akerdene; Parlamentera DEM Partî Ayten Kordu, Hemşaredarê Şaredarîya Qarakoçanî Cafer Oguz, Serekê Pêroyî yê DEDEF’î Alî Riza Bîlîr, Serekê Seypê yê AABF’yî Huseyîn Mat, Hemserekê FEDA’yî Hurrî Kabayel, Serekê Pêroyî yê ADEF’î Muharrem Erdogan, Hemserekê DIK’î Erol Aydin do qisey bikerê, çalakîyî do di rojan dewam bikerê.
Roja ewile ya festîvalî de do babetanê sey “Ziwan, Kultur, Qirkerdişê Bawerî, Rojhelato Mîyanên û Elewîyî” ser o panel bêro organîzekerdene.
Cagira Grûba DEM Partî Gulîstan Kiliç Koçyîgît, Endamê MYK’yî yê Federasyonê Meclîsanê Sosyalîstan (SMF) Huseyîn Şîmşek, Cigêrayox û Nuştox Selîm Temo do beşdarê panelê bibê.
Roja diyîne ya festîvalî de panelê cinîyan do bêro organîzekerdene. Panelî de babeta “Problemê Cinîyan de Qirkerdişê Zayend û Bawerî” ser o Endama Akademîya Jîneolojîye Elîf Kaya, Aktîvîsta Cinîyan a ADEF’î Zeynep Hayir û Muxabîra PÎRHA Nuray Atmaca sey qiseykerdox do ca bigîrê.
Xeylê deyîrbazî do festîvale de sehne bigîrê
Festîvala de ke seba ke Dêrsimî tarîx, kultur û nasnameyê xo rê wayîr vejîyo, yeno kerdene zaf deyîrbazî zî bi deyîranê xo do ca bigîrê.
20 hebî sazgehan paştî daye
Nê sazgehan paştî daye festîvale:
“Yewbîyayîşê Hêzê Demokratîk ê Ewropayî, AVEG-KON, Merkezê Komelê Kurdî yê Demokratîk, Rêxistina Vera Qirkerdişê 38î ya Frankfurtî, Temsîlkara Ewropayî ya Rêxistina Derûdorê Munzurî, Hochtauns AKM, Frankfurt AKM, Gustavsburg AKM, Mainz AKM, Cemevîya Pîr Sultan Abdalî ya Alzeyî, Merkezê Kulturî yê Koçgirî yê Ewropayî, Rêxistina Kulturî ya Kizilirmakî, Rêxistina Gimgimîjan a Almanya, Meclîsê Mîyanneteweyî yê Kurecîkî, Înîsîyatîfê Kîgî yê Almanya, Rêxistina Kurmêşî, Rêxistina Pulurî, CIVRAK AVRUPA e.V.”
