Cagirê Serekê Pêroyî yê MHP’yî Fetî Yildiz kombîyayîşê komîsyonî ra pey Meclîs de qisey kerd û vat: “Mehkemaya Heqanê Merdiman a Ewropayî qerarê veradayîşê Demîrtaşî da. Ganî merdim goreyê qeraranê mehkema têbigêrî.”
Cagirê Serekê Pêroyî yê MHP’yî Fetî Yildiz verê ke kombîyayîşê Komîsyonê Meclîsî dest pêbikero, cewab da persanê rojnamegeran. Yildizî dîyar kerd ke do çarçewayê metnêkî amade bikerê û xebatî do zaf derg nêramê. Yildizî vat: “Beno ke kombîyayîşo peyên bo yan zî peyênî ra ver bo. Ma do metnêkî amade bikerê. Ez bawer nêkena do derg biramo.”
Persê rojnamegeran ê derheqê veradayîşê Selahhattîn Demîrtaşî de, Fetî Yildizî bale ant qeraranê Mehkemaya Heqanê Merdiman a Ewropa (MHME) ser o û wina qisey kerd: “Mehkema qerarê veradayîşê Demîrtaşî danê. Ganî merdim goreyê qeraranê Mehkemaya Heqanê Merdiman a Ewropa têbigêro. Eke MHME’yî binpaykerdişêk dîyo û eşkerayîyêk veradayîşê ey ser o est ba, ganî bêro veradayene. Xora serekê ma Devlet Bahçelî eşkerayîyêk daye. Dimayê vatişanê ey hewce nêkeno ma çîyêko bîn vajê.”
Yildizî îdiayî ke vanê mabênê AKP û MHP’yî de prosesî ser o nakokî est ê red kerdê û dîyar kerd ke ê hemsencîyêk de yê û vat: “Ma do nê prosesî bi serkewtiş biqedînê. Êdî nê saetî ra pey agêrayîş çin o, no kar qedîya.”
