Konferansê cinîyan de ke Kongra Starî 17ê adare Qamişlo de organîze kerd, beşdaran îfade kerd ke Sûrîye qonaxêka hesasî de ya û vat ke seba pawitişê destkewteyan cinî ganî yewîya xo xurtêr bikerê.
Konferansê bi sernuşteyê “Seba ke heqê cinîyan qanûnê bingeyin ê Sûrîye de bêrê temînkerdene pîya têkoşîn bikerê” ke Kongra Starî 17ê adare 2026î Qamişloyî de organîzekerd, beşdaran qisey kerd.
Hemsereka Ofîsê Têkilîyan ê PYDyî Sema Bekdaş îfade kerd ke Şorişê Rojawanî ra nat cinîyan her warî ra têkoşîn kerd û nê têkoşînî nîşan da ke azadîya komelkî azadîya cinîyan reyde girêdaye ya. Vat ke cinî nasname, qanûn û peymanê xo viraştî la nika qeraran de îradeyê cinîyan baş nêyeno temsîlkerdene.
Endama Fermandarî ya YPJyî Zîlane Cesur îfade kerd ke YPJ 14 serrî yo Rojawan û Sûrîye de sîstemê xo awan keno û xebatanê xo dewam keno. Vat ke ê seba heme cinîyan soz danê ke heta peynî estbîyayîş, dewa û îradeyê înan bipawê.
Endama Kordînasyonê Meclîsê Cinîyan ê Vakur û Rojhelatê Sûrîye Emîne Omer vat ke krîzê 14 serrî cinîyan ser o tesîr kerd la cinîyanê Rojawanî heqê xo pawitî. Vat ke qanûnê bingeyinî yê Sûrîyeyî de heta nika madeyêk ke heqanê cinîyan temîn bikero, çin o.
Omere peynî de vat: “Ewro heqê cinîyan talûkeyê cidîye de yê. Cinîyan sîyasetî ra dûrî kenê û sey hemwelatîyanê dereceya dîyine vînenê. Nê qonaxê tarîxî de cinî ganî yewîya xo awan bikerê û yewbînan rê wayîr bivejîyê. Fikrê ma û waştişê ma ganî hempar bê ke ma bieşkê awankerdişê Sûrîye de rol bigîrê.”
