Fûarê kitaban ê Amedî çend rojîyo dom keno û nê rojan de hêrîşê polîsan zî ser weşanxaneyan de kemî nêbeno. Serê nê weşenxaneyan zî weşanxaneyê Aramî anceno. Ma sebebê nê hêrişan wayîrê weşanxaneyê Aramî Hakkî Boltan ra pers kerd.
Wayîrê weşanxaneya Aramî Hakkî Boltan semedê nê erîşan de nîya va: “Nika Fûare cayê pirtûkano cayê kitabano. Şahîyê kitaban fûarê. In fûar zî zê şahîya. Şima vînen şar yen, şar îta heskerdişê xo ê kitaban mecinen û kibanê ke wazenê biwanê û gênê xorê benê. Mordem onîyen in şahî in heskerdîşê kitaban, taybetî heskerdişê kirdî û kirdasîyo û no cî hetê desthilatdaran de bena sebebê nerazîbîyayene.
Desthilatdarî wazenê ke şar in kitaban ra hes nêkero. Qey aye erîşê xo kerd. Hêriş benê serê weşanxaneyanê kitaban. Xusisî Weşanxaneyê Aramî xorê kenê hedef. Qeyê çi? Çike Aram vengê şarî, hişê şarî û nasnameyê şarîyo. Hêrişê xo ayera benê Aramî ser ra.”
Her roj yenê çend kitabanê ma benê
Boltanî bine xêz kerd ke derheqê nê hêrişan û neheqîyan de nêrazîbîyene û wayîr veciyayîşê şarê ma muhîm a. Boltanî nê va: “Çar kitabê ma berdî. Her roj yenê çend kitabanê ma benê. Wazenê ke her roj bêrê îta û hêrişê xo şarî û weşangeran bidê nîşandayene û înan bitersnê. Waştena înan aya. Çar kitabê ma berdî. Yo: kitabê Nelson Mandela bî. Mandela Kesayetekî gird ya dinya o. Dinya cira heskena hema desthilatdarîya Tirkîya cira hes nêkerd û kitabê eyî qedexe kerd. Di: Kitabê Hatîp Dîcle bî. Hatîp Dîcle kesayetêke dûayen ê şarê Kurdî yo. Şar cira hes keno û kitabê eyî waneno. Desthilatdarîye eciz benê, hêriş kenê serê kitabanê Hatîp Dicleyî û dest danê ser. Kitabo bîn ê Xeyrî Dûrmûşî yo. Serekkomarê Tirkîya Recep Tayyip Erdoğan vatêne se? Vatêne: “Ax ax hela in dêsan ra pers kerê nê dêsê şimara çi vacê? Çi vacê, vacê ke zilm û zoro ke ser Xeyrî virazîyayî aye mara vacê.” In kitabêko şima berd, eyî kitabî de zilm û zorê serê Xeyrî Dûrmûşî nûşte bî. Hêrişê eyî kitabî kerd berd. Kitabê ma yê bînê ke berdî eyî cî ê hişmendî û serxobîyayişê şarî bî.
Ma in neheqî qebûl nêkenê. Ma bawerê ke şar zî qebûl nêkeno û bi hest û vindetena xo cewabê dano înan. Zafêrî wayîrê Aramî vecîyê zafêrî kitaban bivanê ke nê hêrişanê sêrê kitaban veng vecê.
