Fuarê Kitaban ê Amedî yo 9. do mabênê tarîxanê 18 û 26ê teşrîna verêne de bi beşdarîya Weşanxaneyanê Kurdkî û xeylê weşanxaneyanê bînan bêro kerdene.
Emserr Fuarê Kitaban ê Amedî yo 9. do bêro kerdene. Fuat do mabênê tarîxanê 18 û 26ê teşrîna verêne de Merkezê Kongre û Fuarî yê Mezopotamyayî yo Mîyanneteweyî yê Amedî de bêro kerdene. Yewîya Weşanxaneyanê Kurdî (YEW-KURD), Odaya Bazirganî û Meslegî ya Amedî (DTSO) û TUYAP bi hemkarî do organîzasyonê fuarî bikerê. Weşanxaneyê Kurdî û sazgehê ziwan û kulturê Kurdkî zî do fuar de ca bigîrê û standanê xo akerê. Amadekarîyê fuarî dewam kenê. Pankart û afîşê fuarî merkezê Amedî de ameyê aliqnayene.
Weşanxaneyê Kurdkî xo amade kenê
YEW-KURD’î dîyar kerd ke nêzdîyê 35 weşanxaneyê Kurdkî do beşdarê fuarî bibê û do standanê xo de ca bidê b hezaran kitabanê Kurdkîyan. YEW-KURD’î vat ke bi seyan nuştoxê kurdî do bêrê standan de kitabanê xo îmza bikerê. YEW-KURD’î da zanayene ke do ziwan û edebîyatê Kurdkî ser o xeylê panelî bêrê kerdene. Fuar do bi merasîmêk bêro akerdene û do 9 rojî dewam bikero.
