Endamê Konseya Rayberî ya KCK’î Mustafa Karasuyî vat ke ganî proses bikirişîyo zemînê sîyasî û huqûqî û hîşyar kerd: “Eke rewşa huqûqî ya gerîla û kadroyan nêro zelalkerdene proses nêeşkeno aver şiro.”
Endamê Konseya Rayberî ya KCK’î Mustafa Karasuyî derheqê Prosesê Aştîye û Komelê Demokratîkî de ANF’yî rê erjnayîşî kerdî. Beşê diyînî yê roportajî wina yo.
Endamê Konseya Rayberî ya KCK’î Mustafa Karasuyî ard ziwan ke semedê serkewtişê prosesî ganî Meclîs bikewo dewre û gamê fermî bêrê eştene û va: “Eke semedê caardişê temînatê huqûqî gamî nêrê eştene proses nêeşkeno aver şiro.”
Mustafa Karasuyî îfade kerd ke badê qeraranê feshkerdiş û qedînayîşê têkoşînê çekdarî yê PKK’yî ganî dewlete berpirsîyarîye bîgiro û vat: “Tirkîya mecbûra ke hinî nê prosesî bianco zemînê sîyasî û huqûqî. Eke vera gamanê ke eşte, serûberkerdişê huqûqî û sîyasî nêrê kerdene, proses nêeşkeno aver şiro.”
Mustafa Karasuyî bale ante muhîmîya zelalkerdişê rewşa huqûqî ya gerîla û kadroyan ser û wina domna: “Seba ke na babete de qanûn nêame vetene, bêbawerîye ameye afirnayene. Eke şertê sîyasetê azad û demokratîkî nêrê caardene aştîya mendî nêbena.”
Mustafa Karasuyî vengdayîşê vîyartişê merhaleya diyîne yê Rayberê Şarê Kurdî Abdullah Ocalanî vist vîrî û nê çîyê vatî: “Na merhale de ganî serûberkerdişê huqûqî bêrê caardene, verê sîyasetê demokratîkî bêro akerdene û şertê azadxebityayîşî yê Rayber Apoyî bêrê caardene. Caardişê heqê hêvî hewcedarîyêka hem huqûqî hem zî qanûnû bingeyî ya.”
Mustafa Karasuyî nêzdibîyayîşê prosesî yê CHP û muxalefetî zî erjna û wina qedîna: “Çareserîya meseleya kurdan û demokratîkbîyayîşê Tirkîya yewbînan rê girêdaye yê. Eke îradeyo sîyasî înkarê seserran caverado, wexto kilm de çareserîya tarîxî ya kurdan û tirkan bena. Qanûno ke Meclîs do vejo ganî goreyê ruhê prosesî bo. Meclîs na merhale de ya beno adresê çaresî ya zî firsetêko tarîxî remneno.”
