Hunermendê kurdî derheqê hêrişanê çeteyan ê Vakur û Rojhelatê Sûrîye û serewedaritişanê Rojhelat û Îranî de eşkerayîyêka nuştekî weşanaye û vat: “Ganî hunermendî vera tehdîdanê çeteyan ê Rojava ser o seba azadîya şarê xo Rojhelat de çalak bi û serkêşîya nê demê nêzdî de ca bigîrê.”
Çeteyanê HTŞ û SMO’yî hêrişanê taxanê Şêxmeqsûd û Eşrefîye de xeylê cinî, gede û welatijê sivîlî kiştê û sûcê şerî kerdê. Semedê hêrişanê bêserûber û hovane bi seyan welatijî birindar bîyî.
Sewbîna xeylê welatijî zî hetê çeteyan ra ameyê remnayîş. Yeno vatene ke 120 hezar welatijî taxan ra koçber bîyê. Keyeyê welatijanê taxan de zî netîceyê hêrişan de rijîyayê û gelekê welatijî binê xirban de mendê. Sewbîna eynî çeteyî çend rojî yo hêrişê Dêr Hafir û dewanê dormeyê Awbendê Tişrînî kenê. Heto bîn ra serewedaritişê Rojhelatê Kurdîstanî û Îran de roja 19. de dewam kenê. TEVÇAND’ê Ewropa û Hunera Mizgîn derheqê hêrişanê çeteyan û serewedaritişanê Rojhelat û Îranî de eşkerayîyêka nuştekî weşanaye.
‘Wazenê nê şarî reyna bikerê qurban’
Hunermendan dîyar kerd ke wazenê şarê kurdî ke herra xo ser o ciwîyenê bikerê qurbanê menfeatanê xo û wina vat: “Heme heqanê merdimîye binpay kenê, goş nêdanê kiştiş, talan û hovîtîyî ke şarê ma ser o benê, eksê ci vernîya qirkerdiş û koçberîyan akenê. Şarê ma ke bi hezaran cangorî hemverê hovîtî û terorê cîhadîstan û çeteyanê dewleta tirkan dayo, dewletê serdestî seba pêameyîşê xo yê bêkrîter û îşxalkerîye, wazenê nê şarî reyna bikerê qurban.”
‘Ruhê yewîye xoverdayîşê Şêxmeqsûd û Eşrefîye de vejîya orte’
Hunermendan dewamê eşkerayîya xo de wina vat: “Ruhê yewbîyayîşî ke xoverdayîşê Şêxmeqsûd û Eşrefîye de vejîya orte, dîyar kerd ke kurdî her çar hetanê Kurdîstan de, tena bi sînorê viraşteyî nê sînorê partî û rêxistinan zî derbas kerd û bi yew ruhî, yew helwêstî hemverê hovîtî de vindertê. No mojneno ke qederê kurdan her ca de yewbînan reyde girêdaye yo o semed ra helwêst zî yew o.”
‘Yewbîyayîş azadîye ano’
Hunermendan wina vengda: “Ma bi nê ruhî, vengdanê heme şarê xo ke, sere de hunermend û roşnvîrî bi nê helwêstê neteweyî û sereberz, ma tewrê çalakîyan bibê û kîşta şarê xo de vinderê. Vera tehdîdane talanî yê HTŞ û Tirkîya ê Rojava ser o û seba azadîya şarê xo yê Rojhelatî, ganî hunermendî çalak bibê. Pêşengîya nê demê nezdî de ca bigîrê ke tena qederê şarê ma nê yê herême bi pêroyî rastê tehdîdanê tewr zoran yenê.
Seba ney; sere de çalakîyî ke do 19ê aşme de Berlîn û Bonî de hemverê ameyîşê serekê HTŞ’yî Colanî yê Almanya do virazîyê û 17 û 25ê aşme de seba azadîya şarê ma yê Rojhelatê Kurdîstanî ganî tena medya dîjîtal ser o nê meydanan de zî ma vindertişê xo bimojnê. Biciwîyo xoverdayîşê şarê ma. Yewbîyayîş azadîye ano.”
