Cinîyan çarçeweyê çalakîya 8ê Adare Roja Cinîyan a Dinya de vizêrî Amed de vafirokî pernayê. Cinîyê ke tewrê çalakîya bîyê dîyar kerd ke ey do xoverdayîşê xo bidomnê û wina vat: “Ganî ma cinî têkoşînê xo berz bikerê, her tim têhet de bê û paştî bidê yewbînî.”
Platformê Cinîyan ê Dîcle yê Amedî çarçewayê çalakîyanê 8ê Adare Roja Cinîyan a Dinya de vizêrî Koyê Kirklar yê qezaya Sûrî yê Amedî de vafirokî pernayê. Temsîlkarê sazgehanê sivîl yê cinî, endamê komeleyanê cinîyan û xeylê kesî tewrê çalakî bîyê. Cinîyan çalakî de vafirokê ke fotografê gesîyê muneteyî ser o bî pernayê û ard ziwan ke vafirok sembolê derbaskerdişê sînoran o û vera qedexeyan îşaretê girdkerdişê hêvî û azadîye ya. Nesrîn Moral û Yasemîn Paçras ke tewrê çalakîya pernayîşî vafirokan bîyê derheqê 8ê Adare de ajansê welatî rê qisey kerd.
‘Ma do xoverdayîşê xo bidomnê’
Xebatkara Şaredarîya Girde ya Amedî Nesrîn Moral tarîxê vejîyayîşê 8ê Adare vîr vist û wina vat: “Na roje o wext ra heta ewro sey rojeka têkoşînê, sey hêvîyêke yena vînayene. Ma na cuye sey têkoşînêk vînenê. No xoverdayîş a roje ra heta ewro dewam keno. Ewro zî no xoverdayîş do bi hewayêke zêde dewam bikero. Çike wexto ke ma vanê sîstemê hemserekî; destpêk ra komînê cinîyan ra bigîro heta ewro, xoverdayîş û xebata cinîyan dewam kerdo. Ewro zî ma do xoverdayîşê xo bidomnê.”
‘Ma hêvî kenê ke ma do qonaxanê aver de hîn zêde serbikewê’
Nesrîn Moral da zanayene ke badê hewt-heşt serran Meclisê xo yê cinîyan ronayê û wina dewam kerd: “Mîyanê xebate de wexto ke firsend ameyenê vînayene, ma Meclisê cinîyan dayene xebitnayîş. Cinî aver şîyene; perwerde ameyene dayene. Hevalê ma yê ke waştenê aver şêrê, ma waştêne bi her hewayî hetkarîya înan bikerê. Ma wazenê cinî her tim bi qerar bê û ma do paştîdayena xo seba înan her tim bidomnê. Ma hêvî kenê ke ma do qonaxanê aver de hîn zêde serbikewê.”
‘Cinî hewldanê ke heqanê xo dest fînê’
Xebatkara Şaredarîya Şaristanê Girdî ya Amedî Yasemîn Paçras zî dîyar kerd ke 8ê Adare seba cinî,yan rojeka xeylê taybeta û wina vat: “8ê Adare Roja Cinîyan a Dinya ya. No bi hezar serran o, têkoşînê ke vera sîstemî, vera zulmê dewlete û zihnîyetê pederşahî danê. No têkoşînêk pîroz o û cinî bi nê hewayî hewl danê heqanê xo bi dest fînê.”
‘Ma do têkoşîna xo gird bikerê’
Dewamê qiseyê xo de Yasemîn Paçras ard ziwan ke cinî hewl danê ke estbîyayîşê xo îspat bikerê û wina vat: “Ma wazenê no şîdet, nê neheqî û qetlîamê serê cinîyan biqedîyê. Cinî cuye ya; wexto ke cinî çin bibê, ne keyeyî benê, ne komel beno, ne zî cuye bena. Naye ra ganî ma her tim ro heqanê xo wayîr vejîyê û têkoşînê xo berz bikerê. Ma cinî ganî her tim teheti bê û paştî bidê yewbînî.”
