Rojnameger Cemîl Oguz semedê 21ê sibate Roja Ziwanê Dayîke bale ante rewşa ziwanê Kurdkî ser o û dîyar kerd ke Tirkîya de serrêk de 70 hezar kitabê Tirkî yenê çapkerdene, serra 2025î de tena 386 kitabê Kurdkî ameyê çapkerdene û vat: “Ganî ma na hûmare zêde bikerê û ma keyeyê xo bikerê dibistanê Kurdkî.”
Konseya Pêroyî ya Rêxistina Perwerdeyî, Zanist û Kulturî ya Neteweyanê Yewbîyayeyan (UNESCO) serra 1999 de 21ê sibate sey “Roja Ziwanê Dayîke ya Mîyanneteweyî” qebul kerd. “Roja Ziwanê Dayîke ya Mîyanneteweyî” serra 2000î ra nat her serre 21ê sibate de yena pîrozkerdene. No qerar seba pawitena ziwanê dinya û ciwîyayîşê ziwananê ke binê tehluke de yê ame dayene. Rojnameger Cemîl Oguz derheqê rewşa zimanê kurdkî de ajansê ma rê qisey kerd.
‘Serra 2025î de tena 386 kitabê Kurdkî ameyê çapkerdene’
Cemîl Oguzî dîyar kerd ke vakurê Kurdîstan û Tirkîya de rewşa Kurdkî astêka nizm de ya û wina qisey kerd: “Îstatîstîk meydan de yo Tirkîya de serrêk de 70 hezar kitabî tTrkî ameyê çapkerdene. Reyna Wezaretê Perwerdeyî zî bi mîlyonan kitab çap keno, nê mîyanê 70 hezarî de nîyê. Ma vanê Tirkîya de 25 mîlyonî kurdî est ê, serra 2025î de tena 386 kitabî ameyê çapkerdene. 70 hezar kitabê tirkî ameyê çapkerdene la heto bin ra zî tena 386 kitabê kurdkî ameyê çapkerdene. Ganî ma na hûmare qatî zêde bikerê. Tirkîya de xeylê companî seba xo kovaran çap kenê Ganî ma zî wina bikerê.”
‘Ganî her sazgeh mîyanê xo de Kurdkî qisey bikero’
Cemîl Oguzî vîr vist ke 21ê sibate Roja Ziwanê Dayîke ya Dinya ya û vat: “Dinya de xeylê şarî est ê ke sey ma ziwanê înan binê tehluke de yo, na roje pîroz kenê. Seba bale biancê serê ziwanê xo çalakîyan virazenê. Ma zî çalakîyan virazenê, la no bes nîyo. Tena seba rojêk ma nê çîyan nêkerê, ganî ma her roje nê çalakîyan virazê. Ganî dikandarê welatê ma her kesî reyde Kurdkî qisey bikerê û ma her çî bi Kurdkî pers bikerê. Wexto ke ma wina kerd dima ra ma eşkenê vajê, seba ziwanî ma karêk kerd. Eke ma tena rojêk çalakîyan virazê tu maneyê a roje nêmaneno. Ganî her sazgeh mîyanê xo de Kurdkî qisey bikero ke ziwanê kurdkî aver şoro.”
‘Ganî ma ziwanê Kurdkî biresnê gedeyanê xo’
Cemîl Oguzî dîyar kerd ke çîyo tewr muhîm o yo ke ganî ziwanê kurdkî bireso gedeyan û nê çîyî ardî ziwan: “Ameyoxe ma gedeyê ma yê. Hemşaredar, nuştoxî, hunermend û heme kesî ganî bifikirê ke gedeyê înan çiqas kurdkî qisey kenê? Ganî ma ziwanê xo biresnê gedeyanê xo. Rasta wezaretî nêverda perwerdeyîya kurdî bibo. La keye de qiseykerdişê kurdkî ra kes nêeşkeno çîyêk vajo. Ganî her kes keyeyê xo de bi kurdkî qisey bikero. Ganî ma keyeyê xo bikerê dibistanê kurdkî. Ewropa de ziwanêke talûke de yê seba pawitena înan peymanî est ê. La Tirkîya nê peymanan qebûl nêkena. Ewro prosesêk est o, ganî Tirkîya serê de nê qanûnî qebûl bikero. La Tirkîya nê çîyan qebûl nêkero zî ganî ma bixebitîyê. Ewro xeylê şaredarî meclisê ziwanan ronayê. Ganî nê meclisî seba qanûnan zor bidê îktîdarê Tirkîya. Eke ti zor nêdê tu qanûnî nêvuryene. Ganî merdim hewl bido ke mîyanê şarî de kurdkî aver şêro.”
