Hemsereka Amedî ya PSAKDî Ayfer Artak vat ke ê kura de nêheqî esto, sey Elewîye verba nê nêheqîyan xover danê û wina vat: “Israrê qeyûman çinbîyayişê qewetê înan nîşan dano. Ma sey Elewîyan verba nêheqîye de xover dano û no ser ganî ma verba qeyûman hetkarîya xo çalakîyan ra bidomnê.”
Sifte Colêmerg, Esenyurt, Mêrdîn, Êlih, Xalfetî, Dêrsim, Pulurî ra peynî zî 29ê teşrîne Miksê Wanî ra qeyûman tayîn kerdê. Verba qeyûman nêrazîbîyayişê şarî domyeno. Sazîyê Elewîye dîyar kerdê ê verba qeyûman ê û qeyûman zî qebûl nêkenê û cayê ke qeyûm tayîn bîyê de beyanat dayê.
Hemsereka Amedî ya PSAKDî Ayfer Artak tayînkerdişê qeyûman ser PÎRHAyî ra qise kerd.
Hemsereka Amedî ya PSAKDî Ayfer Artak vat ke îradeya şarî xesp kerdê û wina vat: “Demokrasî de eke şaredarêk wezîfeyî ra bêro girewtiş, cayê ci meclîsê şaredarîye de endamêk yeno weçînitiş la belê polîtîkaya qeyûmî de îradeya şarî xesp yeno kerdiş. Mîsal ma demo ke qeyûm ame, ma şîyê Mêrdîn, Êlih û Dêrsimî dormereya şaredarîyan girewtbî binê dorpeçî. No nêzdîbîyayiş xespê îradeya şarî yo.”
Ma qeyûman qebûl nêkenê
Ayfer Artak dîyar kerd ke ê sey Elewîyê verba nêheqîyan xover danê û wina domna: “Çi heyfo ke serra 2016î nika verba şarê Kurdî de polîtîkaya qeyûmî gurênenê, Weçînayişê 31ê Adare de şar verba zîhnîyetê qeyûmî de cewaba xo dabî la no zîhnîyet, hewna mantixê qeyûmî şuxilna. Xoverdayişê şarî zaf bi vate yo. Ma zî warî de estê, Dêrsim de dewayê demê vîyarte baxane kerdê û qeyûm tayîn kerdê. Şarê Dêrsimî do qatî qeyûman ra teslîm nêbo, çimkî şarê Dêrsimî şarêko xoverdakar o. Verê şaredarîyan blokê betonan ronayê û hetta rayîran zî girewtê. Ma verba qeyûmî çalakîyan sey merkezî û şaxî hetkarîya xo domnenê, ganî ma verba nê zîhnîyetê faşîstî de têkoşînê xo bidomnê.”
Do şarê Dêrsimî teslîm nêbo
Ayfer Artan aşkera kerd ke qeyûm tena şaredarîye ra nê, nasname, kultur û bawerîya şarî ra yeno tayînkerdiş û vat ke: “Çimkî Dêrsim şaristanê xoverdayişî yo, zafêr Elewîye Dêrsim de cuyenê. Sifte bi nameyê restorasyonî destpê kerdê, nika şar nêeşkeno Gozeyan-warê pîrozî de bawarîya xo bîyaro cayê xo. Verê qeyûmî zî polîtîkaya asîmîlasyonî dewam kerdinê, şarê Dêrsimî û ma sazîyê elewîye qatî teslîmê qeyûman nêbî. Do Dêrsim verba qeyûmî çok nêrono.”
Ayfer Artan wina qedîna: “Ganî verba qeyûmî têkoşînê ma domdar bibo. Do pêvajoya têkoşînî bidomyo û no ser zî ganî heta merkezî heta şaxan sazîyê Elewîye çalakîyan ra hetkarîya xo bidomnê. Her tim do rojeva înan de bibo. Tena bi zîyaretkerdişî nêbeno, domdarî hetkarî lazim a.”
