Endamê Komela Koçî Mîrza Korkmaz derheqê vengkerdişê dewan û prosesî de dîyar kerd ke ganî dewlete astengîyanê agêrayîşê dewan ser o hewana.
Serranê 1990î de bi hezaran dewê Kurdîstanî ameyê veşnayene û vengkerdene. Rayedaranê dewlete nêverda ke dewijî melzemeyanê xo keye ra vejî. Bi mîlyonan kesan koçê şaristananê Tirkîya kerd. Kurdê ke dewanê xo ra koç kerdo, wazenê agêrê warê xo. La ewro xeylê herêmî hetê dewleta tirke ra ameyê qedexekerdene. Derheqê veşnayîşê dewan û prosesî de endamê Komela Cigêrayîş û Çimdarîya Koçberî ya Mezopotamyayî Mîrza Korkmaz ajansê ma (AW) rê qisey kerd.
‘Vengkerdişê dewan polîtîkaya dewlete bîye’
Endamê Komeleya Koçberî mîrza Korkmaz dîyar kerd ke vengdayîşê “Aştî û Komelo Demokratîk’ tesîrê xo heme ca kerd û vat: “Serranê 90î de nêzdîyê 4 hezar dewî ameyê veşnayene. Proses û no hedîse girêdayeyê yewbînan ê. Vengdayîşê Rayberê Şarê Kurdî hêvî da komelî. Koçberî awankerdişê komare ra heta ewro sey planê dewlete yê vengkerdişê cografyaya Kurdîstanî yo. Dewe û xozaya kurdan ameye vengkerdene. Serra 1925î de wextê Şêx Seîdî de bi planê Şark û Islahat û dima serra 1934î de zî Qanûnê Îskanî vejîya û vengkerdişê cografyaya Kurdîstanî dest pêkerd.”
‘Hema zî tayê herêmî yenê qedeexekerdene’
Mîrza Korkmaz da zanayene ke serra 1927î de 13 mîlyon nufusê Tirkîya est bi û wina dewam kerd: “Rayedaran o wext waştêne 11 şaristananê Kurdîstanî de kurdan koçberê şaristananê Tirkîya bikerê. Heto bînî ra tirkî ardê Kurdîstan. Heta serewedaritişê Dêrsim û dima zî serranê 90î de xeylê dewî ameyê vengkerdene. 5 mîlyon kurdî koç bîyê. Erd û malê înan veng mendê. Vengdayîşê “Aştî û Komelo Demokratîk” ra pey barêko giran keweno milanê dewlete ser o . Ganî dewlete seba koçberan zî gaman bierza. Dewijî nika nêeşkenê agêrê dewanê xo. Hema Şirnex û Colemêrg û xeylê cayanê bînan de herêmê qedexeyî est ê. Seba ke aştî biba ganî dewlete nê babetan de gaman bierza.”
Ganî efuyê xo biwazê
Mîrza Korkmaz da zanayene ke seba ke aştî biba ganî Rayberê Şarê Kurdî Abdullah Ocalan azad bo û wina qedêna: “Welatê ma welatêko tarîxî yo. Ganî her kes agêrê herra xo ser o. Çend serrî yê ma wareyanê xo ra dûrî yê. Ewro ganî wayîrvejîyayîşêko xurt bibo. Ganî şarê kurdî waranê xo rê wayîr vejîyo. No wayîrvejîyayîş do tesîrê xo prosesî bikero. Ganî dewlete astengîyan orte ra wedarna. Seba ke aştî biba ganî Rayberê Şarê Kurdî Abdullah Ocalan azad bibo. Bi hezaran kesan şer de cuya xo vîndî kerde. Ganî dewlete rastîyan bivîna û goreyê ey gaman bierza. Ganî kurdê ke koçber bîyê, ê zî seba agêrayîşî xo amade bikerê.”
