Derhênerê sînema Alî Kemal Çinarî, qehremanê xo Gêncoyî sey xêzeromanî hedre kerdo. Kitab, kurmanckî ra dima do nêzdî ra bi kirmanckî zî bêro weşanayene.
Derhênerê sînema Alî Kemal Çinarî, 2017î de bi nameyê ‘Gênco’yî filmêko fantastîk ant. Qehremanê fîlî, sey qehremanê çîyanê eleledeyan vejîyayêne verê temaşekaran. No fîlm hem bi babeta xo hem zî bi tedeyîya xo sînemaya kurdkî mîyan de wayîrê cayêkî taybetî yo. Fîlmê qehremananê superan, sînemaya dinya mîyan de xeylê zaf ê û nê qehremanî tewir-tewir halan de vejîyenê sehneyî ser. Qehremanê ma Gênco zî bi karakter û hêzanê xo kesêko xeylê balkêş o.
Derhêner Alî Kemal Çinarî waşto serebûtanê qehremanê xo Gêncoyî sey xêzeromanî zî hedre bikero. Gênco, sey xêzeromanî wisarê 2025î de hetê Weşanxaneyê Darayî ra bi kurmanckî amebi weşanayene. Nika zî do nêzdî ra reyna hetê Weşanxaneyê Darayî ra bi kirmanckî bêro weşanayene.
Xêzeroman hetê Alî Kemal Çinarî ra ameyo amadekerdene. Xêzê kitabî hetê Rahîme Orake ra ameyê xêzekerdene. Edîtorîya kirmanckîya ci û açarnayîşê kitabî hetê Umer Barasiyî ameyê kerdene.
