Gimgim de Newroze bi sloganê “Azadî û Yewîya Demokratîke” ameye pîrozkerdene. Hemserekê DBP’yî yê Mûşî Umut Yilmaz pîrozkerdişî de vengda îqtîdarî û vat: “Birêz Ocalan bi rolê xo yê tarîxî wirzîya, nika dora dewlete ya.”
Taxa Gimgimê ya Muşî de Meydana Koxê de bi sloganê “Azadî û Yewîya Demokratîk” adirê Newroze ame wekerdene. Pîrozkerdiş bi beşdarîya bi seyan kesan û bi govende dest pêkerd. Warê pîrozkerdişî de vera projeyaê Santralê Enerjîya Jeotermalî (JES) ke yeno waştene ke dewa Xwarîke de bêro viraştene, pankartêk bi nuşteyê “Na herre mîrasê pîy û kalanê ma ya, emanetê azanê ameyoxî ya. Pankartê “Ma JES nêwazenê” ame aliqnayene.
‘Newroza emserrî Newroza azadîye ya’
Hemşaredara Gimgimî Gulbahar Kaya Newroza şarê kurdî pîroz kerd. Hemşaredarê Gimgimî Gîyasettîn Aydemîr bal ant muhîmîya Newroza emserrî ser o û vat: “Adirê Newroze cuya azade afirnaye. Bi seserran o kurdî adirê xoverdayîşî girs kenê. Ez bawer kena ke Abdullah Ocalano ke prosesê aştî da destpêkerdene, do azad bibo.”
‘Birêz Ocalan bi rolê xo yê tarîxî wirzîya’
Hemserekê DBP’yî yê Muşî Umut Yilmazî dîyar kerd ke Gimgim wayîrê ruhêko xoverdayox o û vera talankerdişê ekolojîk ê taxa xo reaksîyon mojna. Yilmazî wina vat: “Ma nêverdanê ke destê xo bidê awe û xozaya Gimgimî. Ma tîya ra venga îqtîdarî danê, Birêz Ocalan bi rolê xo yê tarîxî wirzîya, nika dora dewlete ya. Her keyeye ra kesêk zindanî de yo yan sirgûn de yo. Gimgim wazeno ke gamê huqûqî û qanûnî bêrê eştene.”
Hemsereka DEM Partî ya Muşî Çîçek Tûtûş zî wina vat: “Ma Newroze dîyarî Rayberê Şarê Kurdî Abdullah Ocalan kenê. Ma azadîya fîzîkî ya Birêz Ocalanî û seba kurdan statu wazenê.”
Badê qiseykerdişan adirê Newroze ame wekerdiş. Ciwanan bi coşêko gird xo eşt adirî ser û pîrozkerdiş govendanê dormeyê adirî dewam kerd.
