Dewijanê Gimgimî vera projeyê JES’î yo ke Gimgim de tesîrê 16 dewan keno reaksîyon nîşan da. Dewijan ra Heves Kar, Nacîye Başak û Îmam Karî waşt ke proje bêro betalkerdene.
Projeya Santralê Enerjîyê jeotermalî (JES) yê ke wazenê mîyanê sînoranê dewa Gimgimî Xwarike (Çallidere) de bêro viraştene tesîrê xo serê 16 dewanê Gimgimî de keno.
Vartoyij û aktîvîstê ekolojîyî bi beşdarîya xeylê sazgehanê sîvîl û komelan tena Gimgim de nê her ca de vera santralê enerjî yê jeotermalî reaksîyon nîşan danê. Vera projeye reaksîyonî roj be roj benê zêde.
‘Nêverdanîme kes bêro zengel bido topraxa ma ra’
Dewa Uskira ra Naciye Başake vera JES’î nêrazîbîyayena xo nîşan dana û wina vana: Ma JES nêwazenîme çike JES awa ma rê zehîro, ma rê, heybananê ma rê û herra ma rê zehîro. Ma şonê kotî. Jû ca yo temîz îta mend o wazenê ey zî destê ma ra bigê. Her ca nêweşîya ma herdê xo û awa xo nêdanîme kesî û nêverdanîme kes bêro zengele bido topraxa ma ra.”
Naciye Başake seba ke Gimgimijî herdê xo ra wayîr vejîyê wina veng da: Gerekê şarê ma zê xelekanê zîncîre pê destê jubinî bigêrê. Na dawa eke ba pîya bibim şona sare. Milet kulî ganî bêro têhet, kesê sîyasetî, rêxistinê sivîlî, wekîlî zî bibê. Na topraxe teyna yê ma nîya. Meşte domanê ma, tornê ma, tornê tornanê ma lanetî mîyarê ma ra. Mevajê ‘şima qey toqraxa xo da.’ Eke JES bêro topraxe ma ra hêrs bena. Dar û berê ma, zîyar û dîyarê ma, ma ra hêrs benê. Ma ancax ke pîya bibim na dawa qezenc bena.”
‘Ma nêeşkenê herdê xo başkêşê kesî bikime’
Îmam Kar o 76 serre zî dewa Uskira ra yo û derheqê JES’î de o zî nêrazîbîyayena xo nîşan dano û wina vano: Di kalikê mi jû cepheyê Yunani, jû cî cepheyê Rusî de şehîd bî. Na topraxe ser canê xo do. Na memlekete ma cayê ra nêeşkenê şime. Emrê ma îtade vêrdo ra. Ma nêeşkenê herdê xo başkêşê kesî bikime, her kes bêro tede îşan bikero ma cî seyr bikime.
Şarê ma pêro bîrlig bibo, na meseleya merdene û weşîye ya. Gere ma çareyê ci rê bivênime. Na topraxe eke destê ma ra vecîye marê beno zehîr. To nêeşkera heybanan weye bikê. Citkarîye bikerê, her cî bi zehîr beno.”
Îmam Kar zî seba ke herdê Gimgimî mekewê destê JES’î û talan nêbê pîyabîyayene ser vindeno û wina veng dano: “Vernîya nêy eke abibo, meşte her cayî, heta zîyaranê ma destê ma ra gênê. Gerê bîrligê ma bibo. Pêresê û dawa xo ra wayîr vejîyê. Henî nêbo şono.”
‘Kes nêeşkeno zengele bido hardê ma ro’
Dewijan ra Heves Kare emrê xo dewanê Gimgimî de ramito û nêwazena ke zîyar û dîyarê xo, herdê xo bi pirojeya JES’î zerar bivêno. Reaksîyonê xo wina nîşan dana: Cayê bav û kalê ma yo û înan tede weşîya xo ramita, ma kî tederîme û nêverdanîme kes cikuyo. Wayîrê mal û dawarîme, musadeyê ma kesî rê çin o. Gimgimî serranê verênan de herdlerzêko girs vîyarna, ma nêwazenîme ke reyna herdlerz bibo. Tersê ma zaf o. Kes nêeşkeno zengele bido hardê ma ro. Ma canê xo danîme cayê zengelî ser.”
Dayîka Hevese seba ke HES nêbo wina veng dana: “Kesê mayê ke qurbete de yê pêro bê top bibê kesî meverdê cayê xo.”
