Platformê Ekolojî yê Mûşî vera projeyê JES’î yo ke Gimgim de tesîrê 16 dewan keno reaksîyon nîşan da. Eşkerayîye de waşt ke proje bêro betalkerdene.
Projeya Santralê Enerjîyê jeotermalî (JES) yê ke wazenê mîyanê sînoranê dewa Gimgimî Xwarike (Çallidere) de bêro viraştene tesîrê xo serê 16 dewanê Gimgimî de keno. Platformê Ekolojî yê Mûşî vera projeye reaksîyon nîşan da û yew eşkerayîye da. Wekîla DEM Partî yê Mûşî Sumeyye Boze reyde zaf kesê partîyanê sîyasîyan, temsilkarê komelanê sivîlan û welatîyan paştî da eşkerayîye.
Sumeyye Boz qiseykerdişê xo de bale ante serê projeye û vat: “Amancê na proje zî sey projeyanê bînan talankerdena Kurdîstanî ya. Seba kar kerdena tayê şîrketan ma îzne nêdanîme nê rantî û talanî. Ma riza nêdanîme qirkerdişê xoza û gandaranê nê erdan.” Sumeyye Boz seba ke na proje bêro vindarnayene naye ra dima zî hetê pêro dewan û dewijan de cayê xo gênê.
Aye ra dima Serekê Pêroyî yê Federasyonê Komeleyanê Vartoyî (VADEF) Nurettîn Gomekî qisey kerd û wina vat: “Şîrketan heme merayê dewanê ma mîyanê xo de parsel kerdê. Goreyê tayê polîtîkayan Varto bi taybet ameyo weçînitene. Wazenê ke talan bikerê. Ma na projeye nêwazenîme. Seba ke nêbo destê ma ra çi bêro ma do bikerê.”
‘Herême cayê talanê şîrketan nîya’
Alev Yilmaze serê nameyê Platformê Ekolojî yê Mûşî eşkerayîye kerde. “Vanê seba ke herêma Gimgimî aver şêro na projeye virazîya û bê zirara. Na zûra, na proje xo reyde wêrankerdiş ana. Zerarê JES’an heywanî rê, xoza rê û mordemî rê zaf zafê.”
Alev Yilmaze seba ke projeye bêro vindarnayene nê talebî mardî.
* Projeyê JES û ÇEDî yê ke mîyanê sînoranê Gimgimî de ameyê rastkerdenê ca de bêrê vindarnayene.
* Dorpêçê dormeyê dewanê ma yo ke bi ruhsatanê madenan virazîyo ca de bêro wedaritene û bêro pawitene.
* Projeyê ke rizatîya şarê Gimgimî û dewanê Gimgimî nêgirewta faydeyê a projeye şarî rê çin a. Faydeyê şarî weşîya xo mîyanê dormeyêko bê nêweşin de derbazkerdena.
* Hişyarîya mordemanî îlmî bêro baldarkerdene. Zîreet û heywan weyekerdena herême bêro dîyayene û nê erdî pêşkêşê şîrketan nêrê kerdene.
