Mehmet Emîn Edemen ke 31 serrî zindan de mendbi, nêweş kewtbi û serra 2023î de amebi veradayene, cuya xo vîndî kerde.
Mehmet Emîn Edemen (61) serra 1992 de Sêrt de amebi girewtene û tebaxa 2023î de Hepisxaneyê Gîresunî ra amebi veradayene. Edemenî abîş nêweşxaneyêkê taybet ê Êlihî de cuya xo vîndî kerde. Mehmet Emîn Edenen 20 rojî ra ver demo ke Meletî de keyeyê lajê xo de beno, gonî şona mezgê ey û ey anê Êlih ke bêro dermankerdene. Edemen rixmê heme mudaxeleyanê tibî zî abîş cuya xo vîndî kerde.
Keyeyê Edemen û rayberê DEM Partî û DBP’yî yê Sêrt û Êlihî cenaze girewte û cenaze abîş saetanê erey de Goristanê Sumerî yê qezaya Misircî ya Sêrtî de ameye definkerdene. Parlamentera DEM Partî ya Sêrtî, Hemşaredara Misircî, rayberê partîyan û xeylê kesî beşdarê merasîmê definkerdişê ceneza bîyê.
Seba Mehmet Emîn Edemen Keyeyê Tezîye yê Seyîd Hecî Yusuf Yavuz ê taxa Kulturî de tezîye ameye ronayene.
Mehmet Emîn Edemenî serra 1992î de qezaya Misircî ya Sêrtî de yeno girewtene û 15 serrî Hepisxaneyê Sêrtî de maneno. Dima demêko derd riyê nêweşîyanê xo ra Hepisxaneyê Amedî de maneno. Edemen tewr peyên Hepisxanaeyê Gîresunî de maneno û uca ra tebaxa 2023î de yeno tehlîyekerdene.
