Kênaya girewteyo nêweş Mehmet Emîn Çamî, Şimel Çam vat: “Pîyê mi pay ser nêeşkeno vindero. Wext bi wext vîrê xo vîndî keno û ma nas nêkeno.”
Mehmet Emin Çam (74) ke lîsteya girewteyanê nêweşanê giran ê ÎHD’yî de ca girewto û 2 rey krîzê zerrî vîyarto û rewşa weşîya ey qonaxêko krîtîk de ya. Keyeyê ey ke seba vînayîşê ey şono Hepisxaneyê Tîpê T’yî yê Batmanî, îfade kerd ke Çam pay ser nêeşkeno vindero û rewşa weşîya ey zaf cidî bîya, seba naye zî ganî înfazê ey bêro taloqkerdene.
Kênaya ey Şimel Çam ke Ajansê Mezopotamya rê qisey kerd, vat ke pîyê aye de nêweşîya zerrî ya astê berzî de yo, damarê xo de astengîyê cidî est ê û cuya ey ser o tehluke dewam kena. Şîmel Çam dîyar kerd ke wexto ke şîyî pêvînayîşê pîyê xo, birayê xo nas nêkerdo, seba ke pay ser vindero hêzê ey çin bî û nêeşkayêne qisey bikero.
Şimel Çam îfade kerd ke pîyê aye nêweşxaneyê Batmanî de demo ker ameyêne dermankerdene rastê muameleyêko xirab ameyo. Çam vat ke demo ke ver vergolimanê ey mudaxaleyî ameyêne kerdene, ey zaf dej anto û zaf qîrayo la reyna zî domnayo.
Şimel Çamî vat ke pîyê aye nêwazeno şêro nêweşxane çunke destanê ey qelemçe kenê, wesayîtanê hepisxaneyî reyde berdişê ey, seba ey demankerdiş nîyo îşkence yo û wina domna: “Heta nika heme rayîrê huqûqî ceribnaybî la her wext qerarê ‘eşkeno hepisxane de bimano’ ame dayene. Nika do reyna ey bierşawê nêweşxane.”
Şimel Çam veng da Wezaretê Edaletî û pers kerd: “Merdimêko 74 serre ke nêweş o û vîrê xo çin o, seba veradayîşê ci hîna çi pawenê? Rewşa dewamkerdişê girewtemendişê pîyê mi tena xeletîyêka huqûqî nîya, eynê wextî de xeletîyêka wijdanî ya zî.”
Ame zanayene ke abîş Nêweşxaneyê Unîversîteya Dîcle de teşhîsê weremî Çamî rê yeno dayaene û seba tehlukeya vîyartişê nêweşî do ey dekerê hucreya yewkesî.
