Şarê ke tewrê Kongreya rêxistina DEM Partî ya 2. ya Qezaya Sûrî ya Amedî de bîyî, dîyar kerd ke waştişê şarê kurdî tim aştî yo û vat: “Şarê kurdî bi zerrîpakîye destê xo derg keno. La dewlete qeyûman tayîn kena û şarê Rojawanî ser o hêrişan kena.”
Parlamenterê Partîya Têdûştî û Demokrasîya Şaran (DEM Partî) Pervîn Buldan û Sirri Sureyya Onder 28ê kanûne 2024î de Hepisxaneyê Îmrali de Rayberê PKK’yî Abdullah Ocalanî reyde ameyî têhet. Badê nê têhetameyîşî, 29ê kanûne de mesajêko ke 7 nuqtayan ra yeno pê bi raya pêroyî reyde ame parekerdene. Heyeto ke Sirri Sureyya Onder, Pervîn Buldan û sîyasetmedar Ehmed Turkî ra yeno pê, badê têhetameyîşê Îmraliyî waştişanê Abdullah Ocalanî ser o partîyanê sîyasîyan û sîyasetmedaranê girewteyan reyde ame têhet. Nê têhetameyîşan ser o seba çareyêka demokratîke, rayedarê dewlete û hukmatî gaman nêerzenê, her roje bi SÎHAyan hêriş kenê Vakur û Rojhelatê Surîye. Her roje operasyonê sîyasî virazenê. Rojnamegeran tepişenê û destbend kenê. Serê dezgeyan de gênê. Qeyyûman tayînê kenê şaredarîyan. Hema zî israr kenê ke şerê vera kurdan bikerê. Ser nê çîyanê peyênan şarê Amedî yê ke beşdarê kongreya rêxistina DEM Partî ya Qezaya Sûrî bîyî, fikrê xo Ajansê ma reyde reyde par kerdî.
‘Ma bi têkoşîn û rayberê xo bawer ê’
Nûşeher Mulke dîyar kerd ke badê demêko derg malumatî Rayberê PKK’yî Abdullah Ocalanî ra girewtî û bi nê zaf kêfweş bîyî. Mulke dîyar kerd ke seba aştîyêka menda mesajê zaf muhîmî ameyî parekerdene û vat: “50 serrî yo no şer hema dewam keno. Serekê şarê kurdî rêzdar Abdullah Ocalan seba aştî tim gam eşta û kede daya.”
Mulke bale ant waştişê şarê kurdî ser û wina dewam kerd: “Şarê kurdî tim aştî û seyyewbinîye wazeno. La Dewleta Tirke bi serran o vana ma do seyyewbinîye virazê û hêsirê çimanê dayîkan vindarnê. La dewlete tu gaman nêerzena. Ma dewlete ra bawer nîyê. Waştişê ma dayîkan, aştî û seyyewbinî ya. Gonî bi gonî nêşuwîyena. Gonî bi aştî û seyyewbinîye şuwîyena.”
‘Dewleta Tirke şarî xapênena’
Ensar Ateşî zî dîyar kerd ke dewleta tirke weş zana ke waştişê şarê kurdî çi yo û wina vat: “Şarê kurdî gam erzeno. La dewleta tirke şarî xapênena. Şarê kurdî bi zerrîpakîye destê xo derg keno dewlete rê. La dewlete hema zî gam nêeşta û reyna qeyyûman tayînê şaredarîyanê şarî kena. Hêrişê Vakur û Rojhelatê Surîye kena. Hêrişê awbendê Tişrînî kena. Lazim o ke dewlete gamanê şênberan bierza. Ganî heme partîyê sîvîlî û dezgeyê demokratîkî zî paştî bidê nê prosese.”
‘Yewîya şarê kurdî ferz a’
Nedîm Akkoçî zî va ke no proses bi taybetî seba şarê kurdî û heme şaran prosesêko zaf muhîm o û wina qisey kerd: “Ganî heme kes bi zerrîpakîye nêzdîyê prosesî bibo. La çi heyf ke ma pratîk de na zerrîpakîye nêvînenê çunke dewlete hetêk ra vana aştî la hetêk ra hêrişê Rojawan û awbendê Tişrînî kena û şarê sîvîlî qetil kena. Ganî aqilê xo bîyarê sereyê xo û bizanê ke kurdî êdî xurt ê û kurdê verênî nîyê. Seba aştî ganî bi zerripakîye nêzdîyê prosesî bibê û ganî yewîya şarê kurdî bêra viraştene.”
