Antonio Guterres roniştişê Cenevre yê Konseya Heqanê Merdiman a Neteweyanê Yewbîyayeyan de qisey kerd û vat ke dinya de “huqûqê bihêzan” geş beno û vera heqanê merdiman hêrişê hîrayî est ê.
Sekreterê Pêroyî yê Neteweyanê Yewbîyayeyan (NY) Antonio Guterresî wina vat: “Nê hêrişî nimite nîyê û nişka ra zî nîyê. Bi eşkera û zafêrî bi pêşengîya aktoranê tewr xurtan ra yeno rayraberdene. Heqanê merdiman bi zanayîş û hewayêko stratejîk yenê fedakerdene.”
Guterresî dîyar kerd ke huqûg hetê “huqûqê bihêzan” ra yeno binpaykerene û îqaz kerd ke eke heqê merdiman qels bê do heme sîstem birijîyo. Sekreterê Pêroyî yê NY’yî îfade kerd ke zîrekîya viraşte û teknolojîyo newe sey enstrûmanê tedayî yeno şuxulnayene û da zaneyene ke o semedê nê sebeban bifikar o.
Demokrasî rijnenê
Guterresî bale ante girewtişê rojnameger, pawitoxanê heqanê merdiman, tengkerdişê warê sivîlî, apeykewtişê heqanê cinîyan û cîyakarîya vera kesanê astengdar ser o û vîr vist ke demokrasî yeno binpaykerdene û vat: “Koçberî yenê tacîzkerdene, girewtene û sînoran ra yenê teberkerdene. Koçberî sey hedef yênê mojnayene. Komelê LGBTIQ+ yenê sîyakerdene. Temsîlîyet û şarê herême yenê hedefgirewtene.”
