Sekreterê Pêroyî yê Neteweyanê Yewbîyayeyan (NY) Antonio Guterres vengda rejîmê Îranî ke hêriş û qirkerdişan ra fek verado.
Neteweyê Yewbîyayeyî nameyê Sekreterê Pêroyî yê Neteweyanê Yewbîyayeyan Antonio Guterresî ser o eşkerayîyêka nuştekî daye. Eşkerayî de Antonio Guteressî da zanayene ke rojanê peyênan de goreyê raporanê ke yenê hûmarêka vêş a çalakîkeran ameya kiştene û îfade kerd ke seba nê encaman ê bi endîşe yê. Antonio Guterresî rejîmê Îranî ra waşt ke ê tedaya çalakîkeran nêkerê û vera çalakîkeran çekan nêşuxulnê.
‘Heqê azadîya raman û rêxistinkerdeşî est o’
Antonio Guterresî dîyar kerd ke ganî şarê Îranî bieşkê rexne û waştişanê xo rehet îfade bikerê û wina vat: “Azadîya raman, azadîya xorêxistinkerdişî û çalakîyê aştîyane heqê her kesî yê û nê bi qanûnanê mîyanneteweyî yenê pawitene. Ganî Îran zî nînan ra rêze bigîra.”
‘Înternet nêbo nêbeno’
Antonio Guterres vengda rayedaranê rejîmê Îranî kerd ke rejîm hêriş û qirkerdişan ra fekverado û vernîya resnayîşê înternetî akero ke îmkanê parekerdişê agahîyan bêro kerdene.
Tewr kêm 538 kesî ameyê kiştene
Heto bîn ra sazgehê heqanê merdiman û xeylê hesabanê medya dîjîtal bale ant tedaya ke rejîm vera çalakîkeran keno ser o. Ame eşkerakerdene ke hûmara kişteyan tewr kêm 538 a û nînan ra 48 kesî çekdarê rejîmî yê. La rayedarê rejîmê Îranî derheqê kişteyan de tu agahî nêdano. Ame dîyarkerdene ke çalakîyan de heta nika zafêrê 10 hezar û 600 kesî ameyê destbendkerdene.
