Serekê Rûmetî yê ÎHD’yî Akin Bîrdal mesajê Rayberê Şarê Kurd Abdullah Ocalanî sey mesajêko tarîxî qebul kerd û va: “27ê Sibate mîlad o. No vengdayîş hem hêvî dano hem zî kelecan dano.”
Bi 1ê teşrîna verêne de Serekê MHP’yî Dewlet Bahçelî bi nameyê dewlete meclîs de zîyaretê grûba DEM Partî kerd û destê xo derg kerd Hemserekanê DEM Partî. Dima waşt ke Rayberê Şarê Kurd PKK’yî Abdullah Ocalan meclîs de vengdayîş bikero û vajo ke rêxistine xo fesih bikero û çekan verdo. Nê vengdayîşî ser o bi 23ê teşrîna verêne de Parlamenterê DEM Partî Omer Ocalan bi nameyê keyeyî şî Îmrali û Rayberê PKK’yî Abdullah Ocalanî reyde pêvînayîşêk kerd. Demê winasî de Abdullah Ocalanî mesajêko kilmek û xorîn da şarî. Va ‘Tecrîd dewam keno. Eke şert û çarçewa bêrê viraştene, ez hetê teorîk û pratîkî ra amade ya ke zemînê şerî bikera zemînê huqûqî û sîyasî.’
Badê cû bi nameyê DEM Partî yew heyet ame organîzekerdiş û 22ê kanûne û 28ê kanûne de di rey şi Îmralî û Abdullah Ocalanî reyde pêvînayîşî kerdî. Rayberê PKK’yî Abdullah Ocalanî pêvînayîşê 28ê kanûne de xerîtaya ke 7 madeyan ra yena meydan, şarî reyde pare kerde û berpirsîyarî daye meclîs, partîyê sîyasî, rêxistinê komelkî û heme beşanê şarî. Badê ke heyet zaf partî û rêxistinan reyde pêvînayîşî kerdî, 27ê Sibate de reyna şî Îmrali û agêra. Na rey Rayber Abdullah Ocalanî beyanatêko sey manîfesto şarî reyde pare kerd.
Çapemenîya kurdî, Tirkîya û dinya eleqeyêko xususî û zaf pîl da beyanatî. Hemîne çapemenîya ke Îstanbul de seke bi serran o ke paweyê nê mesajî bîyî, kewtî pêşbazîya weşanî. Zaf dezgeyê çapemenîye weşanê zindî kerdî û hem demî de mesaj bi şaranê dinya reyde pare kerd. Abdullah Ocalanî bi kurdkî û bi tirkî mesajê “Vengdayîşê aştî û şarê demokratîkî” ke tedeyîyê ci zaf dewlemend o û sey manîfestoyî yo, şarî reyde pare kerd. Des hebî bajaranê Kurdistanî de kurdî û dostê kurdan xo eşt qadan û goşdarîya mesajê Abdullah Ocalanî kerd. Badê ke mesaj ameye parekerdiş, temsîlkarê dewletan, partîyê sîyasî û rêxistinê dinya mesajê Abdullah Ocalanî nirxna û eyinî dî.
Mîlad o
Ê kesanê ke bi serranan o seba aştîya komelkî û demokrasîye têkoşîn dano, pawitoxê heqê merdiman û Serekê Rûmetî yê ÎHD’yî Akin Bîrdal o. Akin Bîrdalî, Ajansa Welatî (AW) reyde qisey kerd û 27ê Sibate sey rojêka mîladî qebul kerd.
Akin Bîrdalî, ard ziwan ke înan pêro pîya bi heyecan no vengdayîş goşdarî kerd û wina va: “No mesaj ke 27ê Sibate de pare bî, hem hêvî dana ma, hem zî ma keno bi kelecan. Ma eşkenê 27ê Sibate çareserîya problemê kurdî ya bi rayîrê aştîyane û demokratîk û seba cuya seypê û azade sey mîlad qebul bikerê. Vengdayîşê aştî û şarê demokratîkî tena seba hewcedarîya kurdan nîyo. Eynî wext de seba hewcedarîya aştî, seypê û cuya hempare ya şaranê Tirkîya zî muhîm o. Seba seserra Cumhurîyetê Tirkîya ya 2. ke agêrena Cumhurîyetêko Demokratîk, seba ke bêro dîyarkerdiş ke demokrasî ra teber rayîrê bînî çin ê, muhîm o.
Hîrê mexsedê vengdayîşî est ê
Akin Bîrdalî ard ziwan ke tîya de hîrê mexsedê nê vengdayîşî est ê û wina va: “Ci ra yew PKK o. O dîyin Dewlet o û o hîrêyin zî muxalefetê komelkî û sîyasî yo. PKK’yî no mesaj guret û qerarê Adirbestê Adirî da. No zaf muhîm o. Ganî hukmat û muxalefetê sîyasî û komelkî zî eynî refleksî bidê û cewabê nê vengdayîşî bidê. Ganî êdî no proses mîyanê wextî de nêro vilakerdene û nêro dergkerdene. Ganî çekî êdî bêveng bibê. Na reya yewine nîya. Verê zî zaf reyan hetêk ra çekî ameyî bêvengkerdiş. La di hetê meseleyî est ê. Verê zî seba çareserîyê demokratîk û aştîyane zaf fersendê tarîxî ameyî viraştene. La çi heyf ke qîmet nêdîya nê fersendan. Tewr peynî prosesê dîyalog û muzakereyan ke serranê 2012-2015î de bî. La çi heyf ke biencam nêbî.”
Ganî şertê azadî bêrê viraştene
Akin Bîrdalî da zanayîş ke vernîya PKK’yî de, verê her çîyî vengdayîşê ‘PKK kongre xo kom kero û dima qerarê caverdayîşê çekan bido’ est o. Wexto ke PKK’yî qerarê agirbestî da, waşt ke Rayberê PKK’yî Abdullah Ocalan nê prosesê kongre bi hawayêko rasterast îdare bikero. Na pawitene heqdar a. Seba naye zî ganî tecrîd bêro wedaritiş. Ganî heqê hêvîye bêro dayene. Eger çîyo ke nê prosesî ra yeno waştene azadîye, seypêyî û aştî bo, wextê wînasî de, ganî şertê azadî bêrê viraştene.
O bîn zî ganî meclîs bi lez kom bibo. Serekê Cumhurîyetî vîzêr bi nameyê hukmatî beyanat da. Nê beyanatê ey hêvî dayêne. Reyna Serekê MHP’yî Dewlet Bahçelî Hemserekê DEM Partî Tuncer Bakîrhanî de qisey kerd û va ‘Seba selametîya nê prosesî ma do pîya bibê.’ No zaf muhîm o. Nika meclîs de ÎYÎ Partî û Zafer Partî ra teber heme partîyê bînî vengdayîşî eyinî vînenê. Temsîlkaranê heme partîyan dîyar kerd ke do piştgîrîye bidê prosesî. No zaf muhîm o.
Abdullah Ocalan wazeno kesêk zî teber ra nêverdo
Akin Bîrdalî bale ant prosesê 2013-2015î ser o û wina va: “Bi qasê ke ez zana prosesê 2013-2015î tayê girewtî bî. La na rey hîna akerde û hîra yo. Rêzdar Abdullah Ocalan cehd keno heme kesan dekero zereyê nê prosesî û kesêk zî teber ra nêverdo. No do çareserîye hîna asan bikero.”
Lazim o ke heme hapsîyê sîyasî bêrê verdayîş
Akin Bîrdalî babeta heqê hêvîye ser o zî vindert û va: “Heqê sîyasî û huqûqî muhîm o. Beyanatê vengdayîşî de metnê vengdayîşî ra teber Sirrî Sureya Onderî îlawe kerd. Va ‘ganî sîyaseta demokratîke, hetê huqûqî û sîyasî bêro viraştene.’ Ganî Tirkîya bi lez xo demokratîk bikero. Bi lez Meclîsê Tirkîya yo Gird komîsyon awan bikero. Bi lez xerîta dîyar bikero. Ganî xerîta goreyê bername, dîsîplîn û taqvîmêk bêro dîyarkerdiş. Ganî verê cû tecrîd biqedîyo, heqê hêvîye bêro dayene û hetê fîzîkî ra Rêzdar Ocalan azad bibo. Lazim o ke Qanûnê Terorî Reyde Têkoşîn (TMK) bêro vurîyayene û astengîyê ke vernîya azadîya fikrî û xoîfadekerdişî de yê, bêrê wedaritiş. Ganî rewşa demokratîke ke her kes eşkeno pîya biciwîyo bêro viraştene. Ganî heme hepsîyê sîyasî bi lez bêrê verdayîş. Reyna sûcanê ke vera merdiman ameyê kerdene, ci ra teber sey sûcê tecawizî, dizdîye û kiştiş, seba aştîyêka komelkî efo pêroyî bêro vetene. Ewro 10 hezarî ra vêşêr hepsîyê sîyasî est ê. Ganî pêroyê înan lezabez bêrê verdayîş. Verê cû Fîgen Yuksekdag, Leyla Guven, Selehattîn Demîrtaş û zaf kesê bînî ganî bi lez bêrê verdayîş. Ganî hepsîyê nêweşî bi lez bêrê verdayîş. Ganî êdî Komîteyê Muşahadeyê Îdarî yê Hepisxaneyan bêro fesihkerdiş ke hertim cezayanê hepsîyan derg kena, ganî pêroyê înan bêrê verdayene. Yanî ganî muxalefetê sîyasî û komelkî wezîfeyê xo bîyarê ca.”
Ma vernîya adirê azadîye de reqsê aştîye bikê
Akin Bîrdalî tewr peynî da zanayîş ke nêzdîyê 2-3 aşmî yo seba aştîye Amed, Îzmîr û Îstanbul de xebatî yenê kerdene û wina qedêna: “Seba ke problemê kurdî bi rayîrê sîyasetêko demokratîk û aştîyane bêro halkerdene xebatî est ê. Ganî aştî bibo komelkî no zaf muhîm o. Ganî heme rêxistinê kede û demokrasîye persa ‘Ez eşkena se bikera?’ xo ra bipersê û cewabê ci bigêrê. Seba ke aştî bibo komelkî ganî her kes beşdarê nê prosesî bibo. Ganî heme beşê komelî berpirsîyarîye bigîrê milanê xo ser o. Roşvîrî, sîyasetmedarî, nuştoxî, rojnamegerî, hunermendî, huqûqnasî, cinî û ciwanî ganî bi berpirsîyarîye hereket bikerê. Ganî nê nirxê ke ameyê viraştene, êdî nêrê vinkerdiş. Şarêko birîndar û bi derd û kul est o. Ganî êdî no proses bibo prosesê aştî û demokrasî. Ez hêvî kena ke ma do Newroza vernîya ma de vernîya adirê azadî û aştîye de reqsê aştîye bikê.”
