Şarê dewanê Sehîl El Xab ê Hema dizîye û teda ra tersenê û herêma înan de aramîye çin a.
Şarê herême dîyar kerd ke rayîrê mabênê dewanê Sehîl El Xab ê ke kewenê vakur û rojawanê Hema sey Tîl El Teten, Tîl El Sîyah, Tîl El Xar, Horat, Emurîn, El Letme ûsn êdî bîyo sey “berê sînorî yo nefermî yê mabênê dewletan”. Goreyê vatişê şarê herême ê rayîrî êdî biemnîyet nîyê û rojane wexto ke kedkarî şinê karê xo ser û cotkarî şinê hêgayanê xo, yenê talankerdene û tedaya fekkî înan ser o yena kerdene. Sewzî, telefon, motorsîklet, pereyî ûsn înan ra gênê û dest nanê mal û milkê înan ser.
Nê wextê peyênî de bi şewe dizdê çekdarî bi demançe û kardîyan hêriş kerdbi çewlîkêkê mangayan a şarêkê herême ser. Wayîrê malî ra malê ci girewtbî. Seba çinbîyayîşê emnîyetî dewijan nameyê xo eşkera nêkerd.
Cotkarî nêewtanê ke şirê zereyê hêgayanê xo û tim sewzeyê înan hetê çekdaran ra yenê destserronayene.
Şarê herême bi acizîye perseno: “Heta key do dizdî û talankerî rayîrê ma bibirnê û do rizqê ma binê rehma nê çeteyan de bo?”
Şarê herême bi temamî elewî yê, verê seba laseran zaf sewzeyê înan binê awe de mendibî û zîyanê madîyî dîbî. Nika cuya înan seba tedaya çekdaran binê talûke de ya û nêeşkenê vera înan xo bipawê.
Şar sewbîna vano ke ê tim seba dizdîye gerreyê polîsan kenê la polîsî tena şarî ra pere gênê û nêzdîyê nê komanê çeteyan nêbenê.
Rayberîya Hêzanê Emnîyetî yê girêdayeyê hukmatê demkî yê Sûrîye yê herêma Sehîl El Xab resna ke seba emnîyetê herême û pawitişê mal û milkê şarî bendê kontrolî ronayî û bi şewe dewrîye vejênê. Şarê dewe zî vano ke nê tedbîrî bes nîyê û wazenê ke na rewşe cidî bêro cipersayene û nê grûbê çekdarî bêrê cezakerdene.
