Hemşaredara Qaxizmanî Guner Hatay vera tayînkerdişê qeyûmî reaksîyon mojna û dîyar kerd ke tayînkerdişê qeyûmî hemverê huqûqî yo û vat: “Qeraro ke ameyo dayîş nas nêkenê û do hemverê qerarî de xover bidê.”
Wezaretê Karê Zereyî Şaredarîya Qaxizman ê Qersî yê DEM Partî rê qeyûm tayîn kerd. 20ê sibate de bi îdiayê “endamtîya rêxistine” 6 serrî û 3 aşmî cezaya hepsî Hemşaredar Mehmet Alkan ameybî dayene. Qerarê ceza ra dima awanîya şaredarî hetê polîsan ra ameybî dorpêçkerdene.
Derheqê tayînkerdişê qeyûmî de Hemşaredara Qaxizmanî Guner Hatay ajansê JINNEWS’î rê qisey kerd.
Guner Hatay bale ant serê cezaya ke hemşaredar Mehmet Alkan rê ameybî dayene û vat: “Heta aşmêk yan zî di hewte, bi lez prosesê mehkema da destpêkerdene. Xo rê sûc îcad kerdî, zemînê tayînkerdişê qeyûmî amade kerd û dima nê qerarî girewt. Mehmet Alkan roniştişê peyîn de semedê şert û mercanê hewayî bi rayîrê avûkatê xo mazeret da mehkema. Pêwa ke destpêk de mazeret qebûl kerd zî hela şanî saete 17:00î de qerar da. Pêwa ke hemserek bi xo nêeşka beşdar bibo 6 serrî û 3 aşmî cezaya zîndanî daye ci. Ma û şarê xo nê qerarî sey manaya tayînkerdişê qeyûman vînenê. Hema vaje prosesê weçînayîşî ra nata şarê ma semedê qiseykerdişê qeyûmî yê qezaya ma binê tedaya psîkolojîkî de ya.”
‘Destesernayîşê şaredarî huqûqî nîyo’
Guner Hatay, dîyar kerd ke badê qerarê înan şaredarî de nobete girewta û wina vat: “Badê pawitişê ma yê 4 rojan, şewe saete 02.00î de derûdorê awanî girewt û qerar ma rê neql kerd û ma ra vat ke ganî şima awanîya şaredarî veng bikerê. Embazanê ma reaksîyonê xo hemverê nê qerarî de mojna û înan nê qerarî qebûl nêkerd. Mehmet Alkan ard ziwan ke no qerar û destesernayîşê şaredarî huqûqî nîyo.”
‘Ma do xo ver bidê’
Guner Hatay, dîyar kerd ke no reya ewilî nîyo ke qeyûm tayîn kenê û wina vat: “Do no hîna zaf bibo. La ma tu wext fek têkoşînê xo ra veranêdanê. Ma pêro hemrayanê xo dawetê têkoşînî kenê. Bi taybetî nê hewteyê de ke pîrozbayîyê 8ê Adare yenê organîzekerdiş partîya ke nê welatî de reaksîyon vera kiştişê cinîyan mojnaya, ma yê. Na babete de ma venga pêro embazanê xo yê cinîyan danê ke hemverê sîstemî de xo ver bidê.”
