Hemşaredarê Amedî Serra Bucak û Dogan Hatun 8ê Adara cinîyan yê xebatkaranê şaredarîye pîroz kerd.
Hemşaredarê Amedî yê Şaristanê Girdî Serra Bucak û Dogan Hatun bi munasebetê 8ê Adare Roja Cinîyan a Dinya xebatkarê ke şaredarî serê sibayî dest bi karî kerd, dekewtişê awanîya xizmetî ya Şaredarîya Şaristanê Girdî de pêşwazî kerdê û 8ê Adara Cinîyan pîroz kerd û xebatkaran rê seba xebatanê înan asanîye waşt. Hemşaredar Bucak û Hatun, paketê ke tede dîyarîyê cîya-cîyayî bîyî û hetê Serekîya Daîreya Xizmetê Cinî û Keyeyî ra ameybî amadekedene, dayî cinîyanê xebatkaran. Tayê xebatkaran zî vilike daye Hemşaredare Bucak û sipas kerd.
‘Ma pîya 8ê Adare pîroz bikê’
Badê ke vera şaredarîye de fotograf ame girewtene, Hemşaredare Bucak 8ê Adare Roja Cinîyanê Kedkaran a Dinya ser o qisey kerd. Hemşaredare Bucak bale ant mîtîngê ke do Qada Îstasyonî de bêro kerdene û va: “Ma ciwîyayîşê xo, heqê xo û waştişê aştî ya birûmete ke ma bi têkoşînê xo yê rêxistinbîyayîşî qezenc kerdî, ma ca nêverdanê. Hadê cinîyê delalî, meşte 8ê Adare Roja Cinîyanê Kedkaran a Dinya de, seba ke ma pîya pîroz bikê, saete 11.00 de Qada Îstasyonî de ma bêrê têhet. Wa 8ê Adare, Roja Cinîyanê Kedkaran a Dinya şima rê pîroz bo.”
Pêşwazîkerdişê karkeran de Hetkara Sekreterê Pêroyî Zerîn Turk, serekê daîreyan ê cinî û endamê meclîsî Hemşaredaran reyde bîyî.
Qiseykerdişî ra pey xebatkaranê cinîyan vernîya awanîya şaredarî de govende girewte.
