Hemşaredarê Amedî yê Şaristanê Girdî Serra Bucak û Dogan Hatunî seba destbendkerdişê Şaredarê Îstanbulî û kesê ke pîya ameyê girewtene reaksiyon nişan da va: “Nê tetbîqê bêhuqûqî, eynî wextî de vernîya hêvîyanê aştî û demokrasî yê”
Eşkerayîya ke Hemşaredaranê Amedî çapemenî û raya pêroyî rê kerde nîya ra:
No serê sibayî Şaredarê Îstanbulî yê Şaristanê Girdî Ekrem Îmamoglu, Şaredarê Şişlî Resul Emrah Şahan, rayberê şaredarîye û rojnamegerî zî tede zaf kesî bi operasyonê polîsan ameyî destbendkerdiş, reyna sinorê huqûqî ameyo vîyartene.
Her çî ra ver Ekrem Îmamoglu bi mîlyonan Îstanbulijan temsîl keno û yeno cehd kerdene ke bo îrade bêro xesbkerdiş. No tetbîqo antîdemokratîk ke pê keyf û qeraranê bêsinoran şaredarîyanê DEM Partî ser o yêno tetbîqkerdiş, nika heme şaristanê Tirkîya de eşkera bîyo. Nê operasyonê bêhuqûqî ke bi nameyê hukmatê sîyasî yenê ramitene, heme muxalefetê sîyasî û komelkî kenê hedef.
Nê tetbîqê bêhuqûqî, eynî wextî de vernîya hêvîyanê aştî û demokrasî yê şaranê Tirkîya de astengîyan virazenê. Nê tetbîqî kesêk rê fayda nêdanê, nimûneyê vîyarteyî ney tesdîq kenê. Nê tetbîqî vîjdanê komelî de ameyê mehkûmkerdiş.
Kamî ra yena wa bêro, ma do vera bêhuqûqî û keyfî de vinderê. Ma do bi hawayêko hîna qerardar û hîna pêt, pêkerdişê şaristanî, têkoşînê hemparî, demokrasî, aştî û azadîye bipawê.
Sere de Rêzdar Ekrem Îmamoglu ke îradeyê Îstanbulijan o, ganî heme kesê ke ameyê destbendkerdiş, bêrê veradayene.
