Hemsereka DBP’yî ya Pêroyîye Çîgdeme Kiliçgun Uçar ard ziwan ke ganî dewlete vengdayîşê Serekê Şarê Kurd Apoyî ra dima mesuldarîyanê xo bîyara ca, cade xerîtayêke amade bikera û gamanê cayê bawerîye bierza.
Çîgdeme da zanayene ke meseleya kurdan hinî derbazê asta mîyanneteweyîye bîya û Vengdayîşê Haştîye û Komelê Demokratîkî yê Apoyî tena seba çareserîya meseleya kurdan ney seba qedînayîşê şerê Rojhelatê Mîyanênî zî xîretêk o.
Çîgdeme îfade kerd ke hêzê demokratîkî û kurdî demokratîkbîyayîş de rolê serekeyî ancê ca û nê temînatê cuya hempare yê. Çîgdeme vat: ‘’Kurdî vera înkar û asîmîlasyonî xo ver danê. Çarçewa neteweya demokratîje de kurdî bi modelêkî têgêrenê û ney pêşnîyazê şaran zî kenê. Têgêrayîşê Azadîye yê kurdan peyê vengdayîşê Birêz Ocalanî de yê. La kurdî pabeyê ney ê ke dewlete gamanê cayê bawerîye bierza. Ganî dewlete vengdayîşê Rayber Apoyî ra dima mesuldarîyanê xo bîyara ca, cade xerîtayêke amade bikera û gamanê sîyasî û huqûqîyan bierza.’’
Çîgdeme ard ziwan ke heqê huqûqî û merdiman nêbenê babetê bazarîye û vat: ‘’Tecrîd sûcê vera merdimatîye yo û komelî bi temamî jehrîn keno. ‘Heqê hêvîye’ hem seba merdiman heqêko global o hem zî heqê merdimbîyayîşî yo. Konseya Ewropa wext dabi Tirkîya ke na babete de vurîyayîşan bikera. Ganî ‘heqê hêvîye’ nêbo babeta şantajî. Ganî ‘heqê hêvîye’ yanî azadîya Birêz Ocalanî bêra caardene. Seba ney wa gamê pratîkî cade bierzîyê.’’
