Herêma Serhedî de bi amancê pawitişê vîrê edebî û resnayîşê mîrasê kulturî seba azanê neweyan, KURDÎWAR ame awankerdene. Hemsereka komele Elîf Gemîcîoglu dîyar kerd ke ganî binê sîwanê na komele de her çî bi ferasetê cinîyan û bi ruhê cîwanan bêro rayraberdene.
Vakurê Kurdîstanî de, edebîyat seba pawitişê nasname û ziwanê dayîke bîyo qadanê xoverdayîşî yê tewr xurtan ra yew. Her çekuya ke nusîyena, vera çînbîyayîşî serewedaritişêk o. No mîras herêma Serhedî de bi kokê Feqîyê Teyranî û bi vengê dengbêjîye xo mojneno. Dengbêjîye bi xo, vîro gandar ê edebîyatê Serhedî ya ke tarîx ra heta ewro ameya. Ewro no mîraso bêemsal Serhed de bi sazgehanê neweyan yenê pawitene. Komela Nuştox û Edebîyatkaranê Kurdan a Serhedî (KURDÎWAR), sey sîwanêkê neweyî yê nê vîrî dest bi xebatanê xo kerd. Hemsereka komele Elîf Gemîcîoglu derheqê muhîmîya nê mîrasî û rolê cinîyan ê mîyanê edebîyatî de, ajansê ma rê qisey kerd.
‘Ma do kedkaranê edebîyatî bîyarî pêser’
Elîf Gemîcîoglu dîyar kerd ke Serhed de reya verên a ke komeleyêka winasîne seba nuştox û edebîyatkaranê kurdan yena akerdene û vat: “Bi serran o roşnvîrê kurdî warê nuştiş, amadekarî û redaksîyonî de kede danê. Labelê, perçeyêkê nê kedkaran nêyenê naskerdene yan zî fersendêk nêbîyo ke bêrê pêser. Seba ke kesê ke nê qadî de kede danê yewbînan bişinasnê û binê sîwanê dezgehêk de xebatanê kolektîf bikerê ma game eşt. Amancê ma awankerdişê vîr û arşîvêkê xurtî yo ke ma nê mîrasî biresnê ameyoxî.”
‘Dengbêjî bi xo vîrê edebîyatî ya’
Elîf Gemîcîoglu bal ant xorînîya vîrê herême û Feqîyê Teyranî ser o û wina vat: “Wexto ke ma vanê Serhed warê dengbêjan o, dengbêjî bi xo vîrê edebîyatî yo ke tarîxê ma heta ewro resnayo. Amancê ma o yo ke ma nê mîrasî bipawê, çîyê ke ameyê vîrkerdene înan gandar bikerê û edebîyatkaranê Serhedî yê nimiteyan vejîyê orte. Bi taybetî seba cinî û dayîkan û ê ke wazenê bibê çimeyêko mende.”
‘Lazimtî bi perwerdeyê akademîkî est a’
Elîfe Gemîcîoglu derheqê astenganê hemverê ziwanê dayîke de nerazîbîyayîşê xo mojna û wina qiseykerdişê xo domna: “Nika herêma ma de, seba ke heta ewro fersendê perwerdeyê ziwanê dayîke nêbîyo, merdim nêşêno bi rehetî bi ziwanê xo biwano û binuso. Her çend dersê weçîniteyî yan zî tayê komeleyî est ê zî, seba zengînîya ziwanê Kurdkî nê cehdî bes nîyê. Ma wazenê binê banê komele de nê heme erjan bîyarê pêser û qadê edebîyatî de mil bidê yewbînan. Ma nameyê komele kerd ‘Nuştox û Edebîyatkarê Kurdî yê Serhedî’; no tena yeno manayê ke her kesê ke na qada de xebetîyenê, sey nimûne edîtorya de yan zî her qismê edebîyatî de wayîrê qeleme bo, eşkeno bibo endam. Ma do bi rayîrê panel, konferans û komxebatan platformêko hempar awan bikerê.”
‘Ganî boya cinîyan hîkayeyan ra bêro’
Elîf Gemîcîoglu peynîya qiseykerdişê xo de muhîmîya rolê cinî û cîwanan ê mîyanê edebîyat û ziwanî de îfade kerdê û vat: “Ganî binê sîwanê na komele de her çî bi ferasetê cinîyan û bi ruhê cîwanan do bêro nuştene. Nimûne, wexto ke hîkayeyêk nusîyena, ganî boya cinîyan û vînê komelî ci ra bêro. Ganî her kes wayîrê komele û edebîyatkaranê xo vejîyo. Çîyê ke Kurdîstan û kurdan serê lingan de tepêşeno ziwan, edebîyat û kulturê ci yo. Nê semedî ra, ma veng danê her kesî ke na berpirsîyarîyî bigîrê serê milanê xo.”
