Hemserekê DEM Partî Tuncer Bakirhan û Tulay Hatimogullari, zîyaretkerdişê Selahattîn Demîrtaş û Selçuk Mizrakliyî ra pey beyanat dayî û vatî ke wa embazanê ma serbest bimanî.
Hemserekanê DEM Partîye Tuncer Bakirhan û Tulay Hatimogullari, Hepisxaneyê Edîrneyî de Hemserekê Verê yê HDP’î Selahattîn Demîrtaş û Hemserekê Verê yê Şaredarîya Şaristanê Girdî ya Amedî Selçuk Mizrakli reyde pêvînayîş kerdî.
Peynîya zîyaretkerdişê Selahattîn Demîrtaş û Selçuk Mizrakliyî beyanat ame dayene.
Qiseykerdişê Tuncer Bakirhanî wina yo:
“Embazê ma zaf bi moral û hêz bîyî. Kedkaranê prosesî rê silam erşawitî. Hetkarî danê prosesî, wazenî wa bi aştî tacîdar bibo. Ma înan ra seba averşîyayîşê prosesî pêşnîyazan girewt. No proses de ma wazenî, wa embazanê ma; hetê ma de bibî. No ser zî sifte embazanê ma ke doza Kobanê ra yenî daraznayîş, wa bêrê serbest veradayene.”
Qiseyê Tulay Hatimogullari zî wina yo:
“Ma embazanê xo reyde pêvînayîşêko zaf bi qiymet viraşt, ê zî prosesî ra hetkarî danî. Ganî embazanê ma çarçiweya qeraranê AÎHM’î de serbest bêrê veradayene.”
