Hemserekê DBP’yî yê Pêroyî, reaksîyon nîşan da operasyonê ke Şaredarê Îstanbulî yê Şaristanê Girdî Ekrem Îmamoglu, rojnameger û şaredaranê qezayan ser o virazîya û va ke no destbendkerdiş êrişêko vera îradeyê şarî yo.
Hemsereka DBP’yî ya Pêroyî Çîgdem Kiliçgun Uçar va: “Operasyono ke şaredarê Şaristanê Girdî yê Îstanbulî Ekrem Îmamogluyî reyde zaf şaredarî, rojnamegerî û sîyasetmedarî ameyî destbendkerdiş, êrişêko rasterast o ke îradeyê şarî kerdo hedef. Na hişmendîya ke tehamulê pêkerdişê şaristanî nêkeno, demokrasî nêşinasneno o û bêhuqûqî de îsrar keno, bawerîya şarî ya edalet û demokrasî şiknena. Ma venga hukmatî danê ke şarî rê hurmet biko. Ma qet qebûl nêkenê ke sîyaset bi destê huqûqî dîzayn bibo. Ma îfade kenê ke ganî Îmamoglu û heme kesê ke destbend bîyê, reyna bêrê verradayene û heme kesê ke seba demokrasî û huqûqî têkoşîn danê, ma piştîya înan de yê.”
‘Ganî îradeyê şarî rê hurmet bêro dayîş’
Hemserekê DBP’yî yê Pêroyî Keskîn Bayindirî zî va: “Komelê demokratîkî de, azadîya vatişî, heqê kerdişê sîyasetî û îradeyê şarî vernîya her çîyan de yê. Destbendkerdişê Şaredar Ekrem Îmamogluyî reyde, rojnamegeran û sîyasetmedaran tehdîdêko cidî yo ke vera serdestîya huqûqî û erjanê demokratîkan o. Ganî îradeyê şarî rê hurmet bêro dayîş û astengê ke vernîya prosesê demokratîkan de yê, bêrê wedarnayene. Ma wazenê ke heme kesê ke ameyê destbendkerdiş, desinde bêrê verradayene û prensîbê bingeyinî yê huqûqî nêrê binpaykerdiş. Ma do dewam bikê ke îradeyê şarî bipawê.”
