Hemserekê Federasyonê Cigêrayîşê Îslamî yê Mezopotamya Abdullah Sagirî dîyar kerd ke Rayberê Şarê Kurdî Abdullah Ocalanî ewro prosesêk dayo destpêkerdene û vat: “Ganî ma hem hetê dîn hem zî her hetî ra paştî bidê prosesî û wayîrê ci vejîyê. Ganî ma Serekê xo tena nêverdê.”
Federasyonê Cigêrayîşê Îslamî yê Mezopotamya bi sloganê “Îslamîyetê Demokratîkî ra Ver bi Aştî û Komelê Demokratîkî” Kongreya xo ya Asayî ya 1. 25ê kanûne de ÇandAmed de kerde. Kongreya Federasyonê Cigêrayîşê Îslamî yê Mezopotamya de Abdullah Sagir û Perva Înal sey hemserekê federasyonî ameyê weçînitene.
Federasyonî şaristananê sey; Amed, Batman, Mûş, Wan, Gever, Stenbol, Îzmîr û Mersîn de şubeyê xo akerdê. Do Sêrt, Tetwan, Agirî û Mardîn de zî şubeyê federasyonî bêrê akerdene.
Hemserekê Federasyonî Abdullah Sagir derheqê prosesî de ajansê ma rê qisey kerd.
‘Ganî ma wayîrê proses û Serekê xo vejîyê’
Abdullah Sagirî îfade kerd ke seba ke o vera îşaxalkerdişê Efrînî vinderto û seba ney zî o muftî ra ameyo îxrackerdne û wina vat: “Tirkîya şarê kurdî rê zilm kena, demo ke leşkeranê dewleta tirkan hêrişê Efrînî kerd, mi zî ê rexne kerdê. Rexneyî ra pey ez îxrac kerd. Dewaya kurd û Kurdîstanî do serkewa. Ma do nê rayîrî de şarê xo het de bibê. Ez sereberz a ke hetê şarê xo de vinderta. Dîno ke ma girêdayeyê ci yê Îslam o, xora Îslamîyet mîyanê xo de aştî hewîneno. Serekê Şarê Kurdî Abdullah Ocalanî ewro prosesêk dayo destpêkerdene. Çi ma destî ra bêro hem hetê dînî ra hem zî her hetî ra ganî ma paştî bidê prosesî. La tena bi waştiş û vatişan aştî nêbena, ganî ma şarê xo rêxistin bikerê ke proses bireso amancê xo.”
‘Şarê kurdî amade yo ganî şarê tirk zî amade bibo’
Abdullah Sagirî dîyar kerd ke ê do seba dîno rastîn bixebitîyê û vat: “Ma do seba ke dîno rastîn bêro vînayene, bixebitê la seba ney wext lazim o. Ma do her hetî ra xebatanê xo bidomnê. Ma do mîtîng, konferans û panelan organîze bikerê û şarê xo reyde bêrê têhet. Ma şarê xo tena nêverdê. La tena şarê kurdî reyde nê şarê tirk reyde zî ma bêrê têhet. Şarê ma xora seba aştî amade yo. Ganî şarê tirk zî amade bibo.”
‘Seba aştîyêka domdare ma do bixebitê’
Abdullah Sagirî dîyar kerd ke seba prosesî înan heta ewro 7 panelî organîze kerdê û qiseykerdişê xo wina qedîna: “Babetanê aştî, ziwan û komelê demokratîkî de ma panelî organîze kerdê. Ma kombîyayîşan de manayê ‘aştî’ îfade kerd. Nika ra pey zî ma do keye bi keye bigêrê û xebatan bikerê. Şarê ma tu wext ma tena nêverda. Ma wazenê xebatanê xo bikerê û serkewê. Ma xo ra bawer ê. Ma do dîno ke xo de edalet û têduştîye hewîneno awan bikerê. Seba aştîyêka domdare ma do bixebitîyê.”
