Îsmaîl Tuzun ke Hepisxaneyê Ewleyîya Berze yê Kirşehîrî de yeno girewtene, bi mektubêk binpaykerdişê giran ê hepisxaneyan îfade kerdê. Tuzunî dîyar kerd ke rîyê ferzkerdişê “cigêrayîşê fekê girewteyan” ra nêeşkenê şêrê nêweşxane û heqê înan ê dermankerdişî bi hewayêko sîstematîk yenê astengkerdene.
Îsmaîl Tuzunî mektubê xo de ke pawitoxa heqanê merdiman Nuray Çevîrmen Aykol rê erşawit, bale ant şert û mercanê giran ê hucreyanê yewkesî ser o. Tuzunî dîyar kerd ke saetêk û nêm tena vejîyenê hewşe û wina vat: “Cigêrayîşê zereyê fekî ma rê yeno ferzkerdene. Seba nê kerdişê şenikvînayîşî ma nêeşkenê şêrê nêweşxane. Nêweşîyê ma giranêr benê. Roje de tena saete û nêm awa serdine danê û awa germine zî sey herre herikîyena.”
Tedaya keye û avûkatan kenê
Tuzunî mektubê xo de dîyar kerd ke tena vera girewteyan teda nêyena kerdene, vera keye û avûkatanê înan zî teda yena kerdene. Mektubî de de nê agahîyî dayî: “Pêvînayîşê avûkatan reyde bi kamerayan yenê taqîbkerdene û xebatkarê zindanî bi şeklêko fîîlî goş danê ser. Wextê zîyaretan de keyeyan ser de zaf cigêrayîşî yenê kerdene û tedaya înan yena kerdene ke nêrê zîyaret. Tehlîyekerdişê girewteyan bi şeklêko keyfî yena astengkerdene.”
‘Dest danê nuşteyanê ma ser o’
Tuzunî vat ke her aşme 3-4 reyî serê odayan de cigêrayîşî benê û wina dewam kerd: “Heme amûr û hacetê ma yenê vilakerdene û dest danê nuşteyanê ma ser. Ma nêeşkenê embazanê xo re kitaban bierşawê û serê ma de sînorê 24 kitaban est o.”
Tehlukeyê DAÎŞ û El-Qaîde
Tespîtanê Tuzunî yê tewr balkêşan ra yew zî no yo: “Girewteyê sîyasî qato mîyanênî de yenê girewtene, qatê corên û cêrênî de zî endamê DAÎŞ, El-Qaîde û girewteyê edlîyî yenê girewtene.” Tuzunî mektubê xo de dîyar kerd ke waştişê înan o “hemrayanê xo reyde pîyamendişî” hetê rayberîya hepisxaneyî ra heta nika ameyo redkerdene.
