Îdareyê Kirşehîrî yê Hepisxaneyê Girewteyî yê Ewlekarîya Berze, seba ke hepsî werdanê xiraban nêwenê, bi îdeaya “rayberîye protesto kenê” tehqîqat da dest pêkerdene û cezaya têkîlîye da înan
Îdareyê hepisxaneyî, seba ke werdî ke danê hepsîyan “xirab”ê û ê zî kantînî ra werdanê cîyayan wenê, bi îdîaya “rayberîye protesto kenê” tehqîqatê dîsîplînî da dest pêkerdene û cezaya têkîlîye da înan.
Ozgur Sevîmî, verê ke cezaya xo ya têkîlîye ya 2 aşman dest pê bikero, maya xo Behîye reyde telefon de qisey kerd û çîyê ke ciwîyayê, ê ardî ziwan.
Behîye va: “Lajê mi vat ke werdê înan hende xirab ê ke merdim nêeşkeno biwero. Kantînî ra xo rê tay çîyê werdî gênê, îhtîyacanê xo wina vînenê. Îdareyê hepisxaneyî ke na rewşe dîye, vat ‘şima ma protesto kenê’ û 2 aşmî qedexeyê qiseykerdişê telefonî da ci. No qerarêko kêfî yo. Ez nê qerarî qebul nêkena û ez do gerreyê înan bikera.”
Seba reaksîyonê qerarî, 10 tehqîqatê cîyayî
Dimayê cezaya têkîlîye, Sevîmî û hepsîyê bînî seba ke nê qerarî protesto bikerê reaksîyonê xo mojnayo, derheqê înan de tehqîqatê cîya-cîyayî ameyî dayene. Behîye va: “Lajê mi û embazê ey seba ke vera nê qerarî de reaksîyonê xo mojnê, çalakîya vengvetişî kerda. Lajê mi va ke seba na çalakîye 10 tehqîqatê cîya-cîyayî dayê destpêkerdene. Reyna seba çalakîyan 4 aşmî qedexeyê vînayîşê keyeyî dayê înan. Heta aşma nîsane ma nêeşkenê yewbînan bivînê. Kanî heqê merdiman? Ez do gerreyê înan bikera.”
Goreyê xebera MA’yî Behîye vana: “Lajê mi vano ke tena werd ney, hepisxane hetê pakîye ra zî rewşêka xirabe de ya. Îdareyê hepisxaneyî bi zanayîş korîdoran pak nêkeno. Beno ke nêweş bikewê û enfeksîyon bigîrê.” Behîye rêxistinanê heqanê însanan ra paştî wazena.
Derheqê Ozgur Sevîmî de
Ozgur Sevîm, 31ê Gulane 2016î de qezaya Nisêbîn a Mêrdinî de wexto ke qedexeyê tebervejîyayîşî de girewîyayo nezaret û dima ameyo tepiştene. Sevîmo ke Dadgeha Girane ya 4. ya Mêrdinî de yeno muhakemekerdene bi îdîayanê “herimnayîşê yewîya welatî”, “kiştiş”, “zerardayîşê malê dewlete”, “bêdestûr hewênayîşê maddeyanê talukeyinan” cezaya bêpeynîye û 15 serrî ceza girewto. Cezaya ke girewta 11ê Teşrîna Peyêne 2022î de hetê Daîreya Cezaya Bêpeynîye ra ameya tesdîqkerdene.
