Rayedarê Rejîmê Îranî Heqê dermanbîyayîşê Werîşe Mûradî ke Hepisxaneyê Evînî de yena girewtwnw, yeno astengkerdene.
Heqê dermanbîyayîşê Werîşe Mûradî ke hetê rejîmê Îranî ra ameybî girewtene, aye rê cezaya dardekerdişê yena waştene û Hepisxaneyê Evînî de yena girewtene, yeno astengkerdene. Goreyê agahîyanê ke Rêxistina Heqanê Merdiman a Hengawî pare kerdî, nêweşîyê Werîşe mûradî yê fitiqê paştî û milî est ê la nêyenê dermankerdene. Ame dîyarkerdene ke doktoran 5 aşmî ra ver vato ke ganî bi lez amelîyat biba la rixmê nê zî rayedaranê hepisxaneyî destûr nêdanê ke Werîşê Mûradî sewqê nêweşxaneyî bêra kerdene.
Nêrgîz Muhamed veng da
Pawitoxa heqanê merdiman Nêrgiz Mihemedî seba Werîşe Mûradî veng da û vat: “Rejîmanê zordaran de seba sîstemê edaletî vernîya îqtîdaro otorîterî de sere tewîneno, vera cezaya dardekerdişî wariştiş ganî meseleyê her kesî bo.”
Kampanya ameybî destpêkerdene
Seba paştîdayîşê Werîşe Mûrasî medyaya dîjîtale ya înstagram û X’î de bi sernameyê ‘Bibê vengê Werîşe Mûradî’ kampanyaya hastagî ameybî destpêkerdene. Çalakîker û azadîwazan welatijanê kurdan ra waşt ke bi yew vengî paştî bidê Werîşe Mûradî.
Weşîya aye baş nîya
Kampanyaya ‘Azadî seba Werîşe Mûradî’ dîyar kerd ke rewşa weşîya Werîşe Mûradî xirab a û vat: “Rayedarê hepisxaneyî nêverdanî ke aye şêra teber û bêra dermankerdene.”
Werîşe Mûradî 1ê adara 2023î de Sîne de ameye destbendkerdene. Cezaya dardekerdişê ya Werîşe Mûradî ke roniştişê dewaya aye yê 16ê hezîran û 4ê teşrîna verêne ya2024î de ameye vînayene, bi hewayêko fermî avûkatanê aye rê amebi vatene.
