Eren Keskîn derheqê heqê hêvîye de qisey kerd û da zanayîş ke ganî Tirkîya lezkî sererastkerdişê derheqê hêvîye bikera cuye û va, heqê hêvîye, heqê tewr sereyîn yê Abdullah Ocalanî yo.
Rayberê Şarê Kurdî Abdullah Ocalan 26 serrî yo Îmraliyî de binê tecrîdî de yeno tepiştiş û munaqeşeyê ‘heqê hêvîye’ rojeve de cayê xo gêno. 2014ine de Dadgeha Heqê Merdiman ê Ewropa (DMME) babeta heqê hêvîye de qerar da kesê ke 25 serrî yo zîndan de mendê ganî heqê hêvîye ra feyde bigîrê. Komîteyê wezîran ê Konseya Ewropayî kombîyayîşê 17-19ê êlule de qerarê binpaykerdişî ancî vist rojeva xo û semedê Tirkîya ke gamê somutî bierza heta êlula 2025ine wext da.
Hemsereka Pêroyî ya Komeleya Heqê Merdiman (ÎHD) Eren Keskîn derheqê hêvîye de û averşîyayîşan de Jinnewsî rê qisey kerd.
Eren Keskîn va ke heqê hêvîye semedê tepişteyê ke bi serran tepişte manenê, hêvîya ke rojêke bêrê veradayîş dana. Eren Keskîn wina va: “Derheqê nê de qerarê muhîmî yê DMME’yî est ê. Derheqê Tirkîya de qerarê mahkumîyetî est ê û dewletan rê vanê; sererastkerdişê qanûnî yê newe yê derheqê heqê hêvîye de bikerê. Heqê hêvîye ewro xêrê Ocalanî yena munaqeşekerdiş. Ganî Tirkîya derheqê heqê hêvşye de lezkî sererastkerdişê qanûnî bikero.”
‘Ganî sererastkerdişî bêrê kerdiş’
Eren Keskîn bale ant serê muhîmîyê azadîya fîzîkî ya Abdullah Ocalanî û wina va: “Ocalan tena tepişteyêk nîyo, rayberê şarêk o. Eynî wextî de ewro Ocalanî ser o prosesêk newe yê aştî yeno qiseykerdiş. Ocalan sîyaset de fîgurêk muhîm o. Munaqeşeyê heqê hêvîye erey mendo. Ganî sererastkerdişê huqûqî bêrê kerdiş. Ma prosesêk neweyî de yê. Do hîn sererastkerdişî bêrê kerdiş. Dewlete mecbûr a nê bikero.”
‘Heqê hêvîye tewr xozayî yo’
Eren Keskîn tewr peyîn wina va: “Ganî tecrîd bêro wedaritiş. Bi serran o Îmraliyî de sîstemêk cîya est o. Teberê sîstemê înfazê dewleta tirkan, sîstemêk yeno şuxilnayîş. Ganî keye û avûkatî pêvînayîş bikerê. Çarçewaya heqê hêvîye de ganî şert û mercê azadîye pê bêrê. No heqê tewr xozayî yê Ocalanî yo. Wezîfeyê pîlî yê dewleta tirkan o yo ke nê prosesî biresno serkewtişî. Lazimîya na cografya bi aştî est a.”
