Endamê Şûbeyê OHD’yî yê Îstanbulî avûkat Îhsan Artuçî dîyar kerd ke heqê her kesî est o ke qederê xo tayîn bikero û vat: “Kurdî zî Rojawan de wayîrê nê heqî yê û ganî nê heqê xo bipawê. Şarê kurdî destkewteyanê xo ra fek nêverdano.”
Yew het ra hêrişê ke vera Kurdîstanê Rojawanî yenê kerdene dewam kenê, hetê bînî ra zî seba çareserîya problemanê Sûrîye û Rojawanî pêvînayîş û kombîyayîşî yenê kerdene. Çeteyê HTŞ û SMO’yî yê girêdayeyê Tirkîya 6ê çeleyî ra vera Rojawanî hêriş kenê. Vera hêrişan Rojawan de sefereberîya pêroyî ameye îlankerdene. Şarê Rojawanî qijan ra bigîre heta kal û pîlan kewtî pozîsyonê pawitiş û xoverdayîşî û vanê ke ê nêverdanê ke kes destkewteyanê înan xirab bikero.
‘Ma veng danê vengê Rojawanî’
Avûkat Îhsan Artuçî dîyar kerd ke ê sey avûkatê kurdî zulmo ke şarê kurdî rê yeno kerdene qebul nêkenê û vera ney têkoşîn danê û vat: “Ewro hêrişî vera şarê kurdî yenê kerdene. La teqez heme şarê kurd yew ê. Şarê kurdî ewro her çar parçeyanê Kurdîstanî de payan ser o. Ma zî seba way û birayanê xo yê Rojawanî payan ser o yê û piştî danê Rojawanî. Ma veng danê vengê Rojawanî.”
‘Heqê her kesî est o ke qederê xo tayîn bikero’
Îhsan Artuçî bale ante ke vera şerî peymanê mîyanneteweyî binpay benê û vat: “Kam ca de bibo wa bibo, heqê her kesî est o ke seba ameyoxê xo qederê xo dîyar bikero. Kurdî zî Rojawan de wayîrê nê heqî yê û ganî nê heqê xo bipawê. Rojawan de bi keda zaf serran destkewteyê şarê kurdî awan bîyî. Ganî şarê kurdî fek destkewteyanê xo ra nêverdo. Ma zî venga rayedaranê tirkan û dewletanê bînan danê ke heqanê şarê kurdî nas bikerê. Şima mecbur ê ke nas bikerê zî.”
