Hesen Aksoy, 1991î de şîyo Almanya, karê demîryolî de gurîyo û bîyo taqavût. Peyser amo welatê xo û nika weletê xo de weşîya xo ramneno. Vano ke: “Ez nêwazeno welatê xo ra durî vindêrî, ro û mezgê mi îtade ro.”
Şarê Dêrsimî xeylê serrî yo ke tayê verê şerî ra tayê verê feqîrîye ra tayê zî sebebanê bînan ra welatê xo herdê dewrêşî caverdanê şonê welatanê durîyan. Nê serranê peyênan de tayê Dêrsimijan verê xo çarnayo Dêrsim. Hesen Aksoy, înû ra jû yo. Şarê dewa Bore yo. 1972î de dewa xo ra vejîyê şîyê Mamekîye. Hesen Aksoy 1991î de zî şono remeno Almanya û ucade xebatê asinrayîrîye de teqawut beno.
Hesen Aksoyî heskerdena welatî, wayîr vejîyayişê dewan, îtîqat û kulturî ser ajansê ma rê qisey kerd.
‘Ez welatê xo ra zaf heskon’
Hesen Aksoy, 1991î de şono Almanya û heta ke beno teqawut ucade xebetîno. Seba nê wextanê xo wina vano: “Ez ke şîyo teber, des û hîre serrî nîyama Dêrsim. Ayera dima ke ez çi wext yena, teyna yena welatê xo, cayê bîn nêson. Nêson tatîl. Teyna yeno îta. Yeno welatê xo, yeno lewê qomê xo, sono dewa xo, koyê xo. Sûngû dano arê, fetelînu, helîge dano arê, dano cîranane xo. Mi îltîca kerd, ez Almanya da mendêne. Uzade karê demîryolî de gurîyane. 25 serrî gurîyane. Ma dewa xo ra 1972î de vejîyayme, ameyme Mamekîye. Hona doman bîme. 1994î de dewa ma kerde tal. Dewa ma de kes nêmend. Wisar ke ame dewîjê ma mêsanê xo benê dewa ma, bostû ramnenê, dî hîrê asmî manenê peyser yenê.”
‘Tayîne mi ra vanê ke ti boma’
Hesen Aksoy, wayîr vejîyayena îtîqat û Kulturî ser, welatî heskerdene ser qisey keno û wina vano: “Qomê xo ra vana ke perûne şêrê dewanê xo, mezelûne xo na wayîr vejîyê. Bonûn virazê, jîyaranê xo ra wayîr vejîyê. Sûku de towa çin o, umîdê mî hînîyo ke sarê ma giran giran bo kî sonê dewanê xo.
Sarê ma teber de, oncîya poştî danê jûminî. Îtîqatî ser, zon û Kulturî ser yenê jû ca. Sonê Komelê Elewî, cem girêdanê. Pîr û Talibî yenê. Roje cênê. Ûza îtîqatî ser hebêna rind o. Îtade perûne jûyê, ûza hînî nîyo, Almanî kî, Fransizî kî, her caye de amey pêser.
Ez yon welatê xo de fetelîno, Zimistan son koye xo, vore de fetelîno, wisar ke ame son koyan de fetelîno, her caye de fetelîyena. Nika verê çeberê xo de leyan nan ro. Amnon ke ame domanê mî yênê. Verê çeberî de kaykenê. Ma jûminî ra wayîr vejîme. Çutur ke sarê ma verî weşîya xo ramita hînî bikerê. Verên de kesî raya mahkemeyan nezanitênê. Cem de pîrî kesê ke mabênê xo rind nêbî ardêne verê, haşt kerdêne. Wazena ke waxto verên reyna bêro. Tayê kesî mi ra vanê ‘Bomo ti yena îtade sekena. Çira Almanya de nêvindena.’ Nêzanenê ke zereyê mi de çik est o. Her çîyê mi, mezgê mi, royê mi îta ro.”
