Heyetê DEM Partî ke zereyê ci de DBP, TJA û wekîlî ca gênê, bernameyê fitarî de temsîlkaranê bawerî yê misilman, zerduşt, êzîdî, kakayî û katolîkî reyde ame têhet. Fitarî de mesajê yewîye û aştî vejîya vernî.
Heyeto ke Hemserekê DBP’yî Keskîn Bayindir, Hemverfekê Komîsyonê Têkilîyan yê Teberî yê DEM Partî Berdan Ozturk û Ebru Gunay, Wekîla Mêrdînî Salîha Aydenîz û Endama TJA’yî Adalet Fîdan tede ca gênê heta nika Serekkomarê Iraqî Abdullatîf Reşîd, Walîyê Silêmanî, temsîlkarê KNK’yî, Hereketê Goran, Hereketê Helwest û Enîya Gel reyde ame têhet.
Mesajê aştî vejîya vernî
Heyet vizêr şan de bernameyê fitarî de temsîlkaranê bawerîye yê misilman, zerduşt, êzîdî, kakayî û katolîkî reyde ame têhet. Fitarî de mesajê yewîye û aştî vejîya vernî.
Heme pêvînayîş û zîyaretan de vengdayîşê Aştî û Komelo Demokratîk ser o ame qiseykerdene û heto bînî ra babetê netewî de zî fikir ameyê dayîşûgirewtiş. Heyet ewro herême de roşnvîr, nuştox û akademîsyenan reyde do bêro têhet.
