Heyetê Rojavayê Kurdîstanî yê payeberz Hewlêr de Wezîrê Karanê Teberî yê Fransa Jean-Noel Barrot reyde kom bî.
Wezîrê Karanê Teberî yê Fransa Jean-Noel Barrot 5ê sibate 2026î dest bi zîyaretê hinî welatanê Rojhelatê Mîyanênî kerd. Barrot destpêk de şî Şam û bi Wezîrê Karanê Teberî yê Hukmatê Demkî yê Şamî Esat el Şeybanî reyde pêvînayîş viraşt. Noel Barrotî Şam de eşkerayî daye û dîyar kerd ke o do bi Fermandarê Pêroyî Mazlûm Ebdî reyde bêro têhet. Wezîrê Karanê Teberî yê Fransa bi Fermandarê Pêroyî yê hêzê Sûrîya Demokratîk (HSD) Mazlûm Ebdî, endama Fermandarîya Pêroyî yê Yewîneyê Pawitena Cinîyan (YPJ) Rojhilat Efrîn û Hemsereka Daîreyê Têkilîyanê Teberî yê Rayberîya Xoser Demokratîk Îlham Ehmede reyde kom bî.
Rewşa herême ameya erjnayene
Mazlûm Ebdî serê hesabê xo yê X’î eşkera kerd ke ey û Wezîrê Karanê Teberî yê Fransa Jean-Noel Barrot serê peymana 29ê çele 2026î de vindertê. Sewbîna rewşa DAIŞ’î babeta kombîyayîşî bî. Seba têkoşîna verva DAIŞ’î û raya pawitena hepisxaneyan, keyeyan û girewteyê DAIŞ’î ameyê munaqeşekerdene.
Pawitena xususîyetê herêmanê kurdî û pawitena heqanê kurdan yê Sûrîye bi hawayêko hîra ame erjnayene. Ame vatene ke her di hetan serê pê ameyîşê hêzanê leşkerî û ewleyî de bi teferuat qisey kerdê û serê tewrbîyayîşê YPJ’î senî bo ame erjnayene.
Wezîrê Fransa bale ante muhîmîya caardişê peymanê û paştîdayena fransa seba nê qonaxî mojna. Jean Noel Barrotî dîyar kerd ke Fransa paştîdayena nê qonaxê neweyî kena û seba caardişê peymane çîyê muhîmî do bi ca bîyarê.
Jean-Noel Barrot vernîya kombîyayîşê Heyetê Rojava Hewlêr de bi Serekê Herêma Kurdîstanî Neçîrvan Barzanî reyde pêvînayîş viraşt. Badê pêvînayîşî eşkerayî ame dayene. Barzanî vat ke semedê ke serekkomarê Fransa destek da adirbest û pawitena heqê kurdan spasîya ey kerd.
Noel Barrot zî dîyar kerd ke têkilîyê Fransa û herêmê Kurdîstanî seba aştî û aramîyê herême muhîmo û seba keda Neçîrvan Barzanî yê seba aştî û aramîye spas kerd.
Sewbîna Heyetê Rojava vizêrî bi şewe vernîya bi Jean-Noel Barrotî reyde kom bibê, Sereko Herêmê Kurdîstanî Neçîrvan Barzanî reyde pêvînayîş viraşt û serê prosesê Rojava û Sûrîye de qisey kerd.
Yeno pawene ke Jean Noel Barrot ewro bi Serekê PDK’yî Mesûd Barzanî reyde kom bibo.
