Heyeto ke waşt vîyaro Başûrê Kurdîstanî û Berê Sêmalka ra cenazeyê rojnameger Nazim Daştan û Cîhan Bîlgîn bigîro, Berê Sînorê yê Xabûrî de yeno astengkerdene
Heyeto ke Parlamenterê DEM Partî yê Mêrdînî Kamûran Tanhan, pîyê rojnameger Nazim Daştan, pîyê rojnamager Cîhan Bîlgîn, endamê Komeleya Huqûqnasê seba Azadîye (OHD), MEBYA-DER û DFG ra yeno meydan seba cenazeyê rojnameger Nazim Daştan û Cîhan Bîlgîn bigîrê vizêrî Nisêbîn ra ver bi Başûrê Kurdîstanî kewtê rayîr.
Verê vat ‘X-Ray’ herimîyayo dima vat sîstem şîyo
Heyet resa Berê Xebûr ê Sîlopyayî û tîya de hetê Mudirîyetê Polîsan yê Sîlopyayî ra bi maneyê cîhazê “X-Ray” herîmîyayo, ameyê vindarnayene. Verê ke maneyê X-Rayî bêro vatene heyet nêzdîyê di saetan verê berî de bi maneyê “sîstem” şîyo ame vindarnayene. Dima ke heyet vîyart beşa X-Rayî na rey zî bi maneyê X-Ray herimîyayo, heyet danê vindarnayene. Parlamenter Kamûran Tanhan seba nê maneyî bi Wezaretê Karê Zereyî û Wezaretê Karê Teberî yê Tirkîya reyde pêvînayîşêk kerd la hema zî her di wezaretan ra seba vîyartişê heyetî tu cewabêko pozîtîf nêdayo.
‘No vindarnayîşê heyetî qerarêko keyfî yo’
Kamûran Tanhan seba vindarnayîşê heyetê nîşan da ke no vindarnayîş qerarêko keyfî yo û wina vat: “Hemverê cenazeyan zî hurmet nêmendo. Merdeyan rê zî rêzgirewtiş nêmendo. No tu cayê dinya de çin o. Heme şaristanîyan de pîroz o ke heskerdoxanê xo yê ke şîyê heqîya xo goreyê dîn û bawerîyanê xo wedarnê. No heqêko xozayî yo. O semedî ra hewce nêkeno ke bi rayîrê qanûnan merdim cenazeyanê xo bigêro. Seba nê xozayîbîyayîşî ma zî wazenê cenazeyanê xo bigêrê. Ma seba her di cenazeyan berpirsîyarîya xo ya merdimîye anê ca. Ma nêwazenê astengî vejîyê û ma wazenê cenazeyanê xo bigêrê berê bajaranê înan de wedarnê.
Heyet hema zî Berê Xabûr yê Sîlopyayî de yeno vindarnayene.
