Heyva Sor a Kurd kampanyaya “Wa her keye de nan est bo” daye destpêkerdene û çarçewaya kampanya de do bi hewayêko serûber keye û kesan rê nan vila bikera.
Heyva Sor a Kurd seba rewşa aborî ya Rojavayê Kurdîstanî bi amancê piştgirîya kes û keyeyanê xizan, kampanyaya, “Wa keye de nan est bo” daye destpêkerdene. Çarçewaya kampanya de do heme keye û kesanê xizan rê her roje bi hewayêko serûber nan bêro vilakerdene.
Hîrê şaristanan de dest pêkerd
Heyva Sor a Kurd çarçewaya kampanya de gama yewine eşte û hîrê şaristanan de keye û kesanê xizan rê nan vila kerd. Şaristananê Hesekê, Qamişlo û Tirbespîyê de keyeyê ke ameyê tesbîtkerdene, înan rê nan ame vilakerdene. Ekîbê xebatkar û zerrîwaz ê rêxistine her roje qezayanê cîya de nan vila kenê û bi taybetî keyeyê koçber, kesê bêkar û yê ke tesîrê krîzê aborî de manenê, înan rê vila kenê.
Eke hetkarî bêra do şaristananê bînan ra zî bêra vilakerdene
Berpirsanê kampanyayî dîyar kerd ke waştişê hetkarî demanê peyênan de vêşî bîya û nê semedî ra zî karê vilakerdişê bi rêzêka hîra yeno kerdene. Rêxistine dîyar ked ke na kampanya tena seba hetkarîyêka merdîmîye nîya eynê wextî de seba kêmkerdişê barê cuya rojane cehdêk o. Berpirsan îfade kerd ke piştgirî dewam bikera do kampanya şaristananê bînan ra zî vila bikerê.
Heyva Sor vengdayîşê piştgirîye kerd
Heyva Sor a Kurd veng da rêxistin û kesanê ke wazenê piştgirî bikerê û dîyar kerd ke bi beşdarî û hetkarîyanê xo vernîya kampanyayî akerê ke “nan her keye de est bo” û kes bêhetkarî nêmano.
