Hêzanê Asayîşê Zereyî da zanayene ke îdîayê adirbirnayîşî raşt nîyê û vat sîvîlan remnenê û sey mertalê ganî şuxulnenê.
Grûbê çeteyanê ke girêdayeyê hukmatê vîyartişî yê Sûrîye û dewleta tirke yê, vera taxanê Şêxmeqsûd, Eşrefîye û Benî Zêydî yê Helebî hêrîşanê xo rê dewam kenê.
8 şehîdî û 55 birandarî
Hêzanê Asayîşê Zereyî yê Şêxmeqsûd û Eşrefiyê bi eşkerayîyanê cîya cîyayan derheqê rewşa taxan de zanayîş da. Goreyê eşkerayîya peyêne hêrişan de yê ke 6ê çeleyî ra nata yenê kerdene, 8 kesî şehîd bîyî û 55 kesî birîndar bîyî. Bi seyan banan û binawanîyanê sîvîlan zirar dî.
Xeberê adirbirnayîşî raşt nîyê
Hêzanê Asayîşê Zereyî yê da pêhesnameye ke îdîayê adirbinrayîşî raşt nîyê, hêrişê bi topan, tanqan û ÎHAyan dewam kenê û vat bi nê xeberan wazenê şarî bixapînê.
Sîvîlan remnenê û sey mertalî şuxulnenê
Hêzanê Asayîşê Zereyî ard ziwan ke taxa Şêxmeqsûdî binê ablûqa de yo û vat: “Sîvîlî bi zorî erdê ci ra yenê kerdene, caardişê remnayîş û sey mertalê ganî şuxulnayîşî yenê ciwiyayene. Nuqtayanê kontrolî yê Rayîrê Helep-Efrînî de otobusê keyeyan ke rîyê hêrişan ra taxan ra vejîyayî, ameyî remnayene.
Nê grûban ciwanê ke bi zorî Şêxmeqsûdî ra vetî eştê xo ver û sey mertalê ganî şuxulnayî.”
Çeteyê qirkerdoxî hêriş kenê
Hêzanê Asayîşê Zereyî da zanayene ke hêrişê vera taxanê Şêxmeqsûd, Eşrefiyê û Benî Zêydî hetê grûbanê çekdaran ke verî Suveyda û herêmanê qeraxî yê Sûrîye de tewrê qirkerdişan bîyî û nameyê înan semedê cezakerdişî lîsteya mîyanneteweyî de yê, ame kerdene.
Eşkerayîye de wina ame vatene: “Hêrişî hetê Tumenê 62. (Suleyman Şah), Tumenê 72. (Sultan Murad), Tumenê 76. (El Hamzat) û Tumenê 80. (Nureddin Zengi) ra ameyî kerdene. Nê grûbî hetê Wezîrîya Pawitişî ya hukmatê Şamî ra ameyî qebulkerdene coka hukmat berpirsîyar o.”
Sûcê merdimîye
Eşkerayîye de ame vatene çîyê ke qewimîyenê sûcê şerî yê û huqûqê mîyanneteweyî yeno binpaykerdene.
