Hereketê Kulturî yê Cinîyan a Hîlala Zêrîne bi munasebetê 8ê Adare Roja Cinîyanê Kedkaran a Dinya, seba ke bala dinyayê biancê têkoşîn û xebatanê cinîyanê Vakur û Rojhelatê Sûrîye ser o deyîrêka bi nameyê “Jinên Sûriyeyê” amade kena.
Hereketê Kulturî yê Cinîyan a Hîlala Zêrîne yê Kantonê Reqayî, bi munasebetê 8ê Adare Roja Cinîyanê Kedkaran a Dinya deyîrêka bi nameyê “Jinên Sûriyeyê” amade kena. Amancê Hereketê Kulturî yê Cinîyan o yo ke bi na deyîre têkoşînê cinîyanê ke Sûrîye û bi taybetî Vakur û Rojhelatê Sûrîye de ciwîyenê bi rayîrê huner û muzîkî cinîyan ruhê pîyabîyayîşî xurtkerdiş o.
Bi eseranê hunerî cinîyanê xoverdayoxan rê mesajê piştîdayîşî
Rayberê Merkezê Kulturî yê Hîlala Zêrîne yê Kantonê Reqayî ra Medya Silêman ke derheqê hunerî de ANHA’yî rê qisey kerd, wina vat: “Xebatê hunerî û kulturî, goreyê ruhê prosesanê ke yenê ciwîyayene benê, seba ke mesajê piştîdayîşî biresnê û cinîyanê xoverdayoxan bi taybetî cinîyanê qada şerî rê bibo îlham ma xebatêka winasîne kenê. Cinîyê ke Surîye de ciwîyenê bi huner gêrayîşê heq û azadîye kenê.”
Klîbê deyîre hetê Qelatê Cabîrî de ke Kantonê Tebqayî de ciwîyeno, ame antene. Deyîra ke Emîr El Qewafî vateyê aye nuştê û Studyoyê Serdemî de ameya qeydkerdene, Xemîs Tume vata. Amadekerdişê deyîre de 10 endamê grûba govendî, 10 deyîrbazî û 8 kesî ke def cenenê beşdar bîyî.
‘Seba amancê têkoşînê cinîyanê Sûrîye û Vakur û Rojhelatê Sûrîye bêro fehmkerdene’
Medya Silêman ke bale ant deyîra cinîyanê ke Sûrîye de ciwîyenê sey sembolê têkoşînî mojnena, va: “Vengdayîşê ma heme cinîyan rê yo ke herêmanê cîya-cîyayan de ciwîyenê. Hewl bidê ke amancê têkoşînê cinîyanê Sûrîye û Vakur û Rojhelatê Sûrîye fehm bikê.”
Endama Grûba Govendî Geşbîn Nebo ke dîyar kerd deyîre bale ancena zafkulturîye ya Vakur û Rojhelatê Sûrîye ser o û ana ziwan ke klîbê deyîre de beşdarbîyayîşê hunermendan ê netewanê cîya-cîyayan, cuyêka hempar a mabênê şaran û ruhê Neteweyê Demokratîkî mojnena.
‘Deyîre do 8ê Adare de bêra weşanayene’
Karkeranê ke amadekerdişê deyîre de ca girewto ard ziwan ke heme cinîyê ke dinya de têkoşîn danê, do deyîranê xo yê de ke cinîyan rê vanê, xebatanê cinîyanê Sûrîye û Vakur û Rojhelatê Sûrîye de bivînê û vat ke xebatê montajî yê klîpî do demêko nêzdî de biqedîyê û klîp do 8ê Adare Roja Emekdaranê Cinîyan a Dinya de bêro weşanayene.
