HPG-NRÇ’yî pare kerd ke Artêşê tirkan bi her tewir çekan hêrişê tunelanê gerîlayan keno û wazeno înan tarûmar bikero. HPG-NRÇ’yî vengda her kesî ke vera nê hêrişanê ke merdimîye ra dûrî yê, wurzê.
Beyanatê Merkezê Resnayîş û Çapemenîye yê HPG’yî (HPG-NRÇ) de wina ame vatiş: “Se ke raya pêroyî zana hêzê ma bi pêvajoyê adirbestî ke 1ê adare de dest pêkerd, derbasî pozîsyonêkê cîya bîyî la Herêmanê Zap û Metîna de hêzê artêşa tirkan firsendan gênê, aktîf nêbîyayîşê hêzanê ma xo rê sey firsend vînenê, no ser bi rehetî hereket kenê û wazenê qadanê gerîlayan îşxal bikerê. Bi nê hewayî pozîsyonê adirbestî bi hewayêko zaf lêşîn bi kar anê û wazenê xoverdekaranê tunelan îmha bikerê. Nê hêrişî ke ma beyanatê xo yê rojane de detayê înan pare kerdî, mojnênê ke hêzê artêşê tirkan bi teqîyayeyanê xurtan, gazanê kîmyewîyan, dronanê bomvaranan, sondajanê ke wazenê tunelan qul bikerê, kepçeyanê ke wazenê tunelan tarûmar bikerê û bi çekanê giranan hêrişê tunelanê ma kenê. Tewrê qerarê Kongreya PKK’yî ya 12. zî artêşê tirkan bi taybetî dewa Sêgirê û Girê Amêdîye yê ke nêzdî qezaya Amêdîye yê û dewa Şêlazê ya Metîna ya Başûrê Kurdistanî de, qadanê ma ser o rojanê peyênan de zaf gazê kîmyewî bi kar ana. Artêşê tirkan xo rê kerdo amanc ke bi taybetî nê hîrê kampan de hêzanê gerîlayan bi gazanê kîmyewîyan îmha bikero.
Eşkera yo ke meylêkê rantwerdîya şerî, tîya de wazena qerarê kongreya 12. yê hereketê ma û waştişê Rayber Apoyî çin bibo. No hewldayîşê ferasetê qirkerdişî yê hetkarîya şerî ke wazeno bi îstîfadekerdişê şert û mercanê adirbestî nê hîrê nuqteyan de gerîlayan îmha bikera, nêzdîbîyayîşêko nêmerdane yo. Hem wazeno nê yewî bi çekanê ke mîyanneteweyî de qedexe bîyê, bikero hem zî pêvajoyê aştî sabote bikero. Bi nê hewayî hêrişkerdiş de israr keno. Wa wayîrê nê hêrişî bizanê; eke nê hêrişanê xo yê lêşînan nêvindarnî, hêzê gerîlayan zî heqê xo yê derbasbîyayîşê pozîsyonê aktîfî bi kar anê û bi hewayanê cîyayan verpers danê. Seba ke rewşêka wina rî nîdo, ganî no ferasetê rantwerdîya şerî yê ke dima qehremanîya erjaye, firsend, nêmerd û lêşîn o, bêro vindertene. Eşkera yo ke eger pozîsyonê adirbestî ra nêbîyêne, înan nêeşkayêne bi nê hewayî dorpêçî bikerê. Eşkera yo ke wazenê îstîfade bikerê û netîce bigêrê. Her beşê ke hetkarê aşîtî û çareserîyê yê, ma venga înan danê ke na babete de bi înîsîyatîf bigîrê. Heta ma vengê heme sazîyanê hetkarê heqanê merdiman danê ke vera bikarardişê çekanê qedexeyan wurzê, venga heme dorûveranê hetkarê aştî û demokrasîyê danê ke vernîya dewleta tirke bigêrê ke Metîna û Rojawanê Zapî de bi hewayêko ke merdimîye ra dûrî yo, çekanê qedexeyan bi kar ana.”
Artêşê tirkan hêriş keno, gerîla zî xo paweno
HPG-NRÇ’yî hêrişanê serê hêzanê gerîlayan û cewabê hêrişan de nê agahîyî dayî:
Hêrişê artêşê tirkî:
-9ê Hezîrane de Herêma Şehîd Delîlî ya Rojawanê Zapî de tunelê ma yê Qada Xoverdayîşî ya Girê Amêdîye 2 reyî bi teqebaranan ameyî bombekerdiş.
-10ê Hezîrane de Herêma Şehîd Delîlî ya Rojawanê Zapî de tunelê ma yê Qada Xoverdayîşî ya Girê Amêdîye 9 reyî bi gazanê kîmyewîyan ameyî bombekerdiş.
-5, 6, 9, 10 û 11ê Hezîrane de Herêma Şehîd Delîl ya Rojawanê Zapî de tunelê ma yê Qada Xoverdayîşî ya Girê Amêdîye 11 reyî bi dronanê teqebaranan û gazanê kîmyewîyan ameyî bombekerdiş.
-7 û 8ê Hezîrane de Herêma Metîna de tunelê ma yê Qada Xoverdayîşî ya Şêlazê 5 reyî bi dronanê teqebaranan û gazanê kîmyewîyan ameyî bombekerdiş.
-10ê Hezîrane de Herêma Garê qada Deşta Kafya yew ray bi teyaranê şerî ame bombekerdiş.
-5, 6, 9, 10, 11 û 12ê Hezîrane de Herêma Şehîd Delîlî ya Rojawanê Zapî de 26 reyî bi kepçe û sondajî hewl ame dayîş ke tunelê ma yê Qada Xoverdayîşî yê Girê Amêdîye bêrê tarûmarkerdiş.
-Mîyanê 5-11ê Hezîrane de Herêma Garê qadê Spîndarê, Kanî Sarkê, Zêvkê, Derîyê Hirçê, Deşta Kafya, Dêreşê, Girê Zengil, Herêma Metîna Qadê Xoverdayîşî yê Serê Metîna, Bêşîlî, Herêma Şehîd Delîlî ya Rojawanê Zapî Qadê Xoverdayîşî yê Girê Bahar û Girê Amêdîye bi çekanê giranan, top û obusan ameyî bombekerdiş.
Cewabê hêzanê ma:
-6ê Hezîrane de saete 13:45î de Herêma Şehîd Delîlî ya Rojawanê Zapî de hêzanê ma yê YJA Starî bi teknîkî hedefan dî ke Qada Xoverdayîşî ya Girê Amêdîye de pozîsyonê hêrişî de bîyî û yew kamera ameye îmhakerdiş.
-9ê Hezîrane de saete 13:46î de Herêma Şehîd Delîlî ya Rojawanê Zapî de bi taktîkê sabotajî îşxalkeran ra dî ke hewl danê bi sondajî tunelanê ma yê Qada Xoverdayîşî yê Girê Amêdîye qul bikerê.
-10ê Hezîrane de saete 12:00î de Herêma Metîna de bi teknîkî hedefan dî ke Qada Xoverdayîşî ya Serê Metîna de pozîsyonê hêrişî de bîyî, yew radare ameye îmhakerdiş.
