Partîya Yewîye ya Armenîyan ra Yûsif Derwêşî ard ziwan ke HSD azadîya şaran paweno û goreyê menfaetanê şaran têgêreno.
Partîya Yewîye ya Armenîyan ra Yûsif Derwêşî derheqê pêkerdişê mabênê HSD û hukmatê Şamî yê demkî û qirkerdişê elewîyan de ajansê ANF’yî rê qisey kerd.
Derwêşî ard ziwan ke xîret yeno kerdene ke Sûrîye goreyê hemsengîyanê mîyanneteweyîyan newe ra bêra awankerdene û vat: “Her kes hêzo ke bîyo sey îqtîdar şinasneno. Amancê înan virarkerdişê şaran nîyo la ê qalê vurnayîşî kenê. Mabênê HSD û hukmatê Şamî yê demkî de cîyayî est ê. Fikr, amanc û hedefê înan cîya yê. HSD pawitişê şaran keno û goreyê menfaetanê şaran têgêreno. La îqtîdarê Şamî yanî HTŞ wayîrê amancanê cîyayan o û wayîrê ê hêzî nîyo ke pêroyê koman kontrol bikero.”
Derwêşî kiştişê elewîyan şermezar kerd û vat: “Êyê ke Şamî îdare kenê ganî vernîya kiştişê elewîyan bigêrê. La herinda ney de înan hêrişî vistî asta kiştişî. Eke ma wazenê ameyoxê Sûrîye roşnî bibo, ganî kiştişê elewîyan nêro kerdene. Êyê ke nê qirkerdişî kenê ganî bêrê muhakemekerdene.”
Derwêşî ard ziwan ke ‘Konferansê Dîyalogan ê Sûrîye’ de şarê Sûrîye nêameyo temsîlkerdene û na rewşe rexne kerd. Derwêşî qiseykerdişê xo wina doman: “Feraseto yewperest do nêeşko krîzê Sûrîye çareser bikero. Pêkerdişê mabênê HSD û Şamî zî mojna ke bi ferasetê yewperestîye Sûrîye nêeşkena îdare biba. Rojawan de xoserî est a. HSD her hetî ra rêxistinkerde yo. Ameyoxê Sûrîye modelê Îdareyê Xoserî yê Rojawanî de yo.”
Yûsif Derwêşî bale ante muhîmîya bêvengkerdişê çekan û awankerdişê sîyasetê demokratîkî yê Sûrîye ser o û vat: “Ganî ma welatêkê winasîn awan bikerê ke estbîyayîşê şaran tede yeno qebulkerdene û şar eşkeno bi ziwan û kulturê xo tede qisey bikero. Ganî şar bibo wayîrê heqanê xo yê bigeyînan. Ganî ma modelê Îdareyê Xoserî ra îlham bigêrê.”
