Endamê Konseya Fermandarîya Pêroyî ya HSD’yî Sîpan Hemo sey Hetkarê Wezîrê Pawitişî yê Sûrîye yê berpirsîyarê Herêma Rojhelatî ame tayînkerdene.
Endamê Konseya Fermandarîya Pêroyî ya Hêzanê Sûrîyeya Demokratîke (HSD) Sîpan Hemo çarçeweya Peymana 29ê Çeleyî de sey Hetkarê Wezîrê Pawitişî yê Sûrîye yê berbirsîyarê Herêma Rojhelatî ame tayînkerdene.
Çimeyêkê Wezîrîya Pawitişî ya Sûrîye, Sûrîye TV’yî rê eşkera kerd ke Sîpan Hemo sey Hetkarê Wezîrê Pawitişî yê Sûrîye yê berpirsîyarê Herêma Rojhelatî ame tayînkerdene.
Sîpan Hemoyî ke Nûmedya24 de qisey kerd, vat o do wextê tewr kilmî de dest pê wezîfeyî bikero.
Peymana 29ê Çeleyî de ya ke mabênê Îdareyê Xoserî yê Rojavayî û îdareyê Şamî de ameye kerdene de qerarê muhîmî ameybî girewtene û amebi vatene ke nê qerarî do game bi game bêrê caardene.
Goreyê madeyê 3. yê peymane hetê Wezîrîya Pawitişî ya Sûrîye ra semedê Hesekê tumenêko leşkerî do bêro ronayene û hêzê HSD’yî sey hîrê tugayan ci bêrê entegrekerdene.
Madeyê 6. de zî yeno vatene ke Hetkarê Wezîrê Pawitişî do hetê HSD’yî ra bêro vîjnayene.
Çarçeweya peymana 29ê Çeleyî de gemêke zî tayînkerdişê Walîtîya Hesekê bi. 13ê sibate de Nureddin Isa Ahmed bi qerarnameyê serekkomarê demkî Ahmed El Şarayî ra sey Walîyê Hesekê amebi wezîfekerdene.
