Çeteyê HTŞ’î yê ke hetê dewleta tirkan ra yênê perwerdekerdene, 4 reyan adirbesto ke seba 4 rojan virazîyabî binpay kerd. Çeteyan Qamişlo de hêrişê nêweşxaneyê kerd û zerarêko gird dayo nêweşxaneyî.
Wezaretê Pawitene yê hukmatê demkî yê Sûrîya vizêrî adirbest seba 4 rojan eşkera kerd. Hêzanê Sûrîya Demokratîke (HSD) zî bi eşkerayîyêk dîyar kerd ke ey girêdayeyê adirbestîyê û da zanayîş ke heta hêrişî nêrê kerdene do ti têgêrayîşê leşkerê pê nêyarê. Goreyê xebera ajansê Hawarî (ANHA), îlanê adirbestî ra 10 deqîqeyî dima çeteyanê hukmatê demkî yê ke dewleta tirkan paştîdayena înan kena 4 reyan adirbest binpay kerdo.
Çeteyanê HTŞ’yî saete 20:20 de hêrişê hepisxaneyê Eqtan ê şaristanê Reqayî ke çeteyê DAIŞ’î tede yenê girewtene kerd. Merkezê Resnayîşî yê HSD’î derheqê hêrişî de eşkera kerd şervanêke înan birîndar bîyo.
Saete 21:11 de çeteyanê hukmatê demkî bi obisan şaristanê Zirganî yê kantonê Cizîre topbaran kerd.
Saete 21:55 de çeteyanê hukmatê demkî hêrişê dewa Til Barûdî yê serê rayîrê Ebyetê başûrê Hesekê kerd.
Saetanê nêmeyê şewe de çeteyan hewl da ke şaristanê Sirîne yê Kobanî ser aver bêrê, la şervananê HSD’î derbe dayê înan ro û ê mecbûr mendî ke apey biancîyê.
Hemwextê nê binpaykerdişan teyareyê keşfî yê dewleta tirkean saete 00:37î de nuqteyêka ewleyî dewa Hiwêce yê şaristanê Qamişlo û cayê kombîyayîşê erebeyan ê nêweşxaneyê zerrî û çiman yê şaristanî bombabaran kerd.
