Hûmara yewine ya Rojnameyê Komînalî bi manşetê “Xurtkerdişê komûnî qasê ‘Welatê Rojî’ biqîymet o” vejîyaye.
Rojnameyo aşmane yê Komînalî ke bi şîarê “Israrê merdimbîyayîşî, israrê sosyalîzmî yo” dest bi weşanî kerd, bi manşetê “Xurtkerdişê komûnî qasê ‘Welatê Rojî’ biqîymet o” vejîyaye.
Hûmara yewine de bi giranî “Manîfestoyê Komelê Demokratîkî yê Komunalî” ke Rayberê Şarê Kurdî Abdullah Ocalanî nuşt, ca girewt. Manîfesto hetê komîsyonêk ra esasê Vengdayîşê Haştî û Komelê Demokratîkî yê 27ê sibatê 2025î ser o seba çapî ame amadekerdene.
Rojnameyê 20 rûpelî de 16 rûpelî manîfesto yo ke binê sernuşteyanê “Tebîet û Mana”, “Tebîetê Komelkîye û Problematîk” û “Komelê Tarîxî de Dihetîyê Komûn û Dewlete” de yo. Manîfesto alternatîfê sîstemê modernîteya kapîtalîst o û şîfreyê viraştişê cuyêka newîye ya komelê demokratîkî yê komunalî dano. Dîyar keno ke komel kede û qîymetanê cinîyan ser o şekil girewto la nê awanbîyayîşî ameyê xesbkerdene.
Erjnayîşo sîyasî
Rojnameyî de eynî wext de nirxnayîşê sîyasî û nuşteyê “Vejîyayîşî de” zî est ê. Qapaxê peyênî de resimê ciwanîya şehîdê Xoverdayîşê Zindanê Amedî Mazlum Doganî est o.
