Hunermendê kurdî Xelîl Xemgîn û Amele bal ant ser proseso ke hetê Rayberê Şarê Kurdî Abdullah Ocalan ra ame destpêkerdiş û dîyar kerdê ke eke nê seba Abdullah Ocalan bibînê do kesî nêeşkîyêne nê barî bigirewta û vatê: “Êdî de demê awankerdişê Aştî û Komelê Demokratîkî yo.”
Hunermendê sey Xelîl Xemgîn, Amele, Comerd, Sosin, Xemgîn Bîrhat zî mîyan de nêzdî 60 hunermend beşdarî kombîyayîşo ke Merkezê Kulturî yê Keyeyê Kurdan ê şaristanê Kolnî yê Almanya de pêameyîş kerd. Hunermendî kombîyayîş de terraq û nîqaş ser prosesê “Aştî û Komelê Demokratîkî” yê ke hetê Rayberê Şarê Kurdî Abdullah Ocalan ra ame destpêkerdiş, kerdê.
Hunermend Xelîl Xemgîn û Şanoger Amele Ajansê Welatî rê qisey kerd.
‘Pêro neslê komelî paştî danê projeyî’
Hunermend Xelîl Xemgînî da zanayîş ke şarê kurdî her tim Abdullah Ocalanî ra bawer keno û ard ziwan ke şar her ca de û bi pêro neslanê xo paştî dano Abdullah Ocalan û projeyê ey.
Xelîl Xemgînî dîyar kerd ke demo ke manîfestoya Abdullah Ocalanî ameye eşkerakerdiş, mîyanê komelî de rewşa hesasî vejîyayî meydan û va ke la nika roje bi roje şarê kurdî vengdayîşê Ocalanî ra hîna zêde fam keno.
‘Gere şarê ma semedê awankerdişê Aştî û Komelê Demokratîkî rolê xo kay biko’
Xelîl Xemgînî peynîya qiseykerdişê xo de dîyar kerd ke şer bi di hetan yeno meydan û wina va: “Ma wazenê ke dewlete zî na babete de game bierzo ke no proje biraso serkewtişî. Heta nika îcraatanê dewlete zaf bawerîye nêdanê. La şarê kurdî nêeşkeno bikewo mîyanê pawitişî. Gere şarê kurdî bêxebate û bêhereket nêmano. Gere şarê ma semedê serkewtişê projeyê ‘Awankerdişê Aştî û Komelê Demokratîkî’ rol û misyonê xo bîyaro ca.”
Hunermend Amele zî dejê ke demê şerî de qewimîyayî ardî vîrî û ard ziwan ke qirkerdişan ra dima êdî dem demê aştîye yo.
Hunermend Amele wina va: “Na game ke serekî eşta, mîyanê şarê kurdî û pêro şaranê dinya de veng da. Êdî no adiro ke hetanû nika xeylê kes veşna, zafêrî zî kurdî veşnayî nika dewleta tirke zî veşneno. Gere dewleta tirke êdî game bierza. Êdî tu alternatîf çin o ke dewleta tirke game nêerza.”
‘Serekê ma awêk kerd no adirî ser’
Hunermend Amele peynîya qiseykerdişê xo de va ke eke Rayberê Şarê Kurdî Abdullah Ocalan nêbîyêne, kesî nêeşkayene game winayin girde bierzo û wina dewam kerd: “Gere êdî Rojhelatê Mîyanênî de pêro şarî û kêmnetewî aramî û aştîye mîyan de biciwîyê û biresê heqanê xo. Eke Serekî nêbînî, kesî nêeşkayene na game bierzo. Serekê ma awêk kerd no adirî ser. Gere êdî her kes bi fekê çûçike bî zî awe bîyaro û no adirî ser bikero.”
