Hunermend-nuştoxo arjantînij Federico Racca ke semedê azadîya Rayber Apoyî kampanya rayra beno, vat: “Ocalan Mendelayê roja ma yo. Zaf çîyê ci est ê ke ma bimûsno.”
Çend rojî verî serkêşîya hunermendê arjantînijî Federico Raccayî de komêka hunermendan çarçeweya hemleya “Abdullah Ocalanî rê azadîye meseleya kurdan rê çareserîye” de serê Înstagramî ra kampanyaya bi nameyê “A Place For Ocalan” (Cayêk semedê Ocalanî) daye destpêkerdene.
Bi kampanya yeno vengdayene ke her cayê dinya de hunermend, aktîvîst û kesê hîsgêrî verê xo de kursuyo veng ronê û Rayber Apoyî rê paştdayîşê sembolîkî ramojnê.
Ajansê ANF’yî Federico Raccayo ke bi tewirê xo yê aktîfî yê heqanê merdiman yeno zanayene, derheqê kampanya de qisey kerd.
Federico Racca wina bale anceno hetanê hîsgêr û polîtîkî yê Kampanya ser: “Abdullah Ocalan zerrîya mi de ciwîyeno. Ez ey tim têna xeyal kena. Coka ez wazenê verê xo de cayêk bidî ey.”
Federico Racca nê vatî: “Des serran ra zafêr o ke ez Têgêrayîşê Kurdan nas kena. Mi verî hîkayeya Abdullah Ocalanî eşnawit. Dima ra mi şarê kurdî û têkoşînê ci nas kerd. Mîyanê serran de ez Ocalanî ser zaf çî mûsaya, mi nuşteyan û hunerê xo de ey ser xebityaya. Abdullah Ocalan tim zerrî ya mi de ciwîyeno. Gama ke ez ey fîkîryena zerrîya mi bena teng, çike ez tim ey têna xeyal kean. Coka ez tim û tim wazenê verê xo de cayêk bidî ey.
Bi na kampanya ez wazena ke Ocalan dahîna zaf bêro vînayene. Tênatîya ey û şertê ke tede yê wa bêrê vînayene. Wa pêro bizanê ke na rewşe senî ma dejnena. Ez hêvî kena ke netîce bêro girewtene. Ma kampanya pîya bi psîkanalîste arjantinijî Francisco Larrambebere û paştdayîşê Têgêrayîşê Cinîyan ê Kurdan- Amerîkaya Latîne û tay embazanê xo rayra benê. Hûmara ma kêm a la karê ma rayra şino. Hem zî bi xorîbîyayîşî beno. No huner o; xorîyîya ke çalakîye zaf tesîrê ma kena. Ocalan Mandelayê ewroyî yo. Gama ke ez ey fîkîryena ez nêeşkena hesaranê tepişî. Zaf çîyê ci est ê ke ma bimûsno. Ma destur medê kursuyê verê ma veng bimano.”
