Îdareyê Xoserîya Demokratîke yê Kantonê Cizîrî eşkera kerd ke bê xopawitiş aştîya raştîkêne nêbena.
Îdareyê Xoserîya Demokratîke yê Kantonê Cizîrî eşkerayîya xo de vat: “Ma beşdarîya xo ya temame ya Seferberîya Pêroyî îlan kenê û dîyar kenê ke na seferberîye seba pawitişê şarê ma û destkewteyanê şorişê ma wezîfeyêka neteweyîye û exlaqî ya. Her çend ke ma terefdarê haştîye bibê zî, ma îfade kenê ke bê ‘xopawitiş’ haştîya raştîkêne nêbena.”
Ruhê xoverdayîşî ganî bi berpirsyarîya kolektîfe bêro caardene
Îdareyê Xoserî dîyar kerd ke têkoşîno ke şar heme beşanê xo reyde keno, sey erjêko biqîmet vînena û vat: “Ma selam danê heme şaranê ke binê şertanê tewr çetinan de bi îradeyê xo, bingeyê wayûbiratîya ciwîyayîşê hemparî û edaletê komelkî ser o tecrubeyêko demokratîk û pêşeng afirna. Serrgêra 13. ya awankerdişê Rayberîya Xosere de, ma veng danê ke ruhê xoverdayîşî ke pawitişê meşrû yê erd û rûmetî ser o yo, bi hişyarî, rêxistinbîyayîş û berpirsyarîya kolektîfe bêro caardene.”
Ma hetê çareserîye yê aktîf ê
Îdareyê Xoserî na çarçewe de qerardarîya xo ya pawitişê destkewteyanê Şorişê Rojawanî û Şorişê 19ê temmuze reyna tekrar kerd ke netîceya têkoşînanê çetinan vera bedelanê giranan, zulm û terorî de vejîyayî meydan.
Dewamê eşkerayîye de: “Ma beyan kenê ke her prosesî de ke seba çareserîya krîzanê Sûrîye yo, ma do bibê hetêko aktîf. Ma dîyalogî ra sey weçînayîşêko stratejîk bawer kenê; çareserîya sîyasîye ya demokratîk û nemerkezî, garantîya heqanê heme beşan û bingeyê haştîye û îstîqrarê mendeyî vînenê.”
Bê xopawitiş aştîya raştîkêne nêbena
“Her çend ke ma terefdarê aştîye bê zî, ma dîyar kenê ke bê ‘xopawitiş’ aştîya raştîkêne peyda nêbena. Eke şer ma ser o bêro ferzkerdene yan zî estbîyayîş û heqê şarê ma bêrê hedefgirotene, ma do pawitişê xo yê meşrû bi her rayîrî bîyarê ca û hemverê her talûkeyan de ke emnîyetî û îstîqrarê herêma ma tehdîd kenê, amade bibê.”
